tejashree pradhan drunk scene swanandi veen doghantali hi tutena : ‘झी मराठी’वरील लोकप्रिय मालिका ‘वीण दोघांतली ही तुटेना’ सध्या कथानकातील नव्या वळणांमुळे चर्चेत आली आहे. मालिकेतील ‘स्वानंदी’ हे पात्र साकारणारी अभिनेत्री तेजश्री प्रधान पुन्हा एकदा तिच्या अभिनयामुळे प्रेक्षकांचे लक्ष वेधून घेत आहे. नुकत्याच प्रसारित होणाऱ्या भागांमध्ये स्वानंदीचा एक वेगळाच अंदाज पाहायला मिळणार असून, त्यासाठी तेजश्रीने साकारलेला ‘ड्रंक सीन’ सध्या चर्चेचा विषय ठरत आहे.
या सीनबद्दल बोलताना तेजश्रीने अनेक रंजक गोष्टी उलगडल्या. कलाकार म्हणून विविध प्रकारच्या भावना पडद्यावर साकाराव्या लागतात, मात्र काही प्रसंग हे नेहमीच्या भूमिकेपेक्षा अधिक आव्हानात्मक असतात, असं ती म्हणाली. विशेषतः मालिकेतील मुख्य नायिका साकारताना तिची प्रतिमा जपणं महत्त्वाचं असतं. प्रेक्षक त्या पात्राशी भावनिकरित्या जोडलेले असतात आणि अनेकदा त्यांचं अनुकरणही करत असतात. त्यामुळे प्रत्येक सीन करताना जबाबदारीची जाणीव ठेवावी लागते, असं तेजश्रीने सांगितलं.
स्वानंदीच्या व्यक्तिरेखेत आतापर्यंत निरागसपणा आणि संयम दिसून आला आहे. मात्र या नव्या सीनमध्ये तिच्या भावनांना वेगळा मार्ग मिळतो. दारूच्या नशेत ती मनात दडवलेल्या गोष्टी व्यक्त करते. याच गोष्टीने अभिनेत्री म्हणून स्वतःला काहीतरी वेगळं करण्याची संधी मिळाल्याचं तेजश्रीने स्पष्ट केलं. मालिकांमध्ये नायिकांना अनेकदा ठराविक चौकटीतच दाखवलं जातं, पण या प्रसंगामुळे स्वानंदीची वेगळी बाजू साकारण्याची संधी मिळाली, याचा तिला आनंद असल्याचं तिने सांगितलं.
विशेष म्हणजे, खऱ्या आयुष्यात तेजश्री कधीही ड्रिंक करत नाही. मित्रमैत्रिणींसोबत बाहेर गेल्यावर ती स्वतः गाडी चालवण्याची जबाबदारी घेत असल्याचंही तिने सांगितलं. मात्र अभिनयासाठी निरीक्षण महत्त्वाचं असल्याने पार्टीमध्ये इतर लोक कसे वागतात, कसं बोलतात, त्यांची देहबोली कशी बदलते याचं ती बारकाईने निरीक्षण करत असते. त्याच निरीक्षणाचा उपयोग या सीनमध्ये झाला. याआधीही एका मराठी चित्रपटात तिने अशाच प्रकारचा प्रसंग साकारला होता आणि त्या भूमिकेसाठी तिला पुरस्कारही मिळाला होता.
तेजश्रीने आणखी एक महत्त्वाची गोष्ट सांगितली ती म्हणजे, शूटिंगदरम्यान ती स्वतःचे शॉट्स वारंवार मॉनिटरवर पाहत नाही. स्वतःला पडद्यावर पाहताना अनेकदा कलाकार गोंधळून जातो, त्यामुळे दिग्दर्शकाच्या निर्णयावर विश्वास ठेवून काम करणं ती पसंत करते. या सीनमध्येही लेखक आणि दिग्दर्शकांनी स्वानंदीचा मूळ स्वभाव कायम ठेवण्याचा प्रयत्न केल्याचं तिने नमूद केलं.
हे पण वाचा.. अंकिता वालावलकरची कान्स चित्रपट महोत्सवात एन्ट्री; म्हणाली, मराठीचं प्रतिनिधित्व करताना अभिमान वाटतो
tejashree pradhan drunk scene swanandi veen doghantali hi tutena
स्वानंदी या पात्राबद्दल बोलताना तेजश्री म्हणाली की, तिला सर्वात जास्त आवडणारी गोष्ट म्हणजे या व्यक्तिरेखेला कधीही “टिपिकल रडणारी नायिका” म्हणून दाखवण्यात आलेलं नाही. स्वानंदी स्वतःच्या आयुष्यात घडणाऱ्या प्रत्येक गोष्टीबद्दल प्रश्न विचारते आणि स्वतःचं मत मांडण्याचा प्रयत्न करते. त्यामुळे हा ‘ड्रंक सीन’ केवळ मनोरंजनापुरता मर्यादित नसून, तिच्या मनात दडलेल्या भावनांना आवाज देणारा प्रसंग असल्याचंही तिने स्पष्ट केलं.
हे पण वाचा.. दीप-ज्योती फेम अनुप बेलवलकरची अंकुश चौधरीसोबत खास भेट; “फोटो काढायलाही भीती वाटत होती…”
आता स्वानंदीचं हे वेगळं रूप प्रेक्षकांना कितपत भावतं, याकडे मालिकेच्या चाहत्यांचं लक्ष लागलं आहे.
