anup belwalkar meets ankush chaudhari fan moment : ‘दीप-ज्योती’ मालिकेमुळे घराघरात पोहोचलेला अभिनेता अनुप बेलवलकर सध्या एका वेगळ्याच कारणामुळे चर्चेत आला आहे. आपल्या अभिनयाने प्रेक्षकांची मनं जिंकणाऱ्या अनुपने नुकताच सोशल मीडियावर एक खास अनुभव शेअर केला असून त्याची ही पोस्ट चाहत्यांचे लक्ष वेधून घेत आहे. विशेष म्हणजे हा अनुभव मराठी चित्रपटसृष्टीतील लोकप्रिय अभिनेता “अंकुश चौधरी” यांच्याशी संबंधित आहे.
अनुप बेलवलकरने सोशल मीडियावर अंकुश चौधरींसोबतचा एक फोटो पोस्ट केला. मात्र हा फक्त फोटो नव्हता, तर एका चाहत्याच्या मनात दडलेल्या भावना त्याने शब्दांत व्यक्त केल्या. समोर उभ्या असलेल्या आपल्या आवडत्या सुपरस्टारकडे पाहताना नेमकं काय वाटत होतं, हे सांगताना अनुप खूपच भावूक झालेला दिसला.
त्याने पोस्टमध्ये लिहिलं की, अंकुश चौधरी समोर दिसताच त्याच्या डोळ्यासमोर त्यांच्या अनेक गाण्यांच्या आणि चित्रपटांच्या आठवणी तरळू लागल्या. ‘ये गो ये ये मैना’, ‘वाऱ्यावरती गंध पसरला’, ‘आभास हा’, ‘मन धागा धागा जोडते नवा’, ‘देवा’ आणि ‘बहरला हा मधुमास नवा’ यांसारखी लोकप्रिय गाणी त्याच्या मनात सतत फिरत होती. त्या क्षणी तो अभिनेता नसून एक चाहता बनला होता, असं त्याने सांगितलं.
अनुपने आपल्या बालपणीच्या आठवणीही या पोस्टमधून शेअर केल्या. गावात मोठे कलाकार आले की त्यांना पाहण्यासाठी होणारी उत्सुकता, त्यांच्यासोबत फोटो किंवा सही मिळवण्याची धडपड आणि नंतर ती अभिमानाने सगळ्यांना दाखवण्याचा आनंद, हे सगळं त्याला पुन्हा अनुभवायला मिळालं. अंकुश चौधरींना प्रत्यक्ष पाहिल्यानंतर अगदी तसंच वाटल्याचं त्याने नमूद केलं.
या भेटीदरम्यानचा आणखी एक खास प्रसंगही त्याने सांगितला. नेहमीप्रमाणे रात्री त्याच्या आई आणि बहिणीचा व्हिडिओ कॉल आला होता. त्यावेळी समोर अंकुश चौधरी उभे असल्याचं त्याने त्यांना सांगितलं. त्यानंतर त्यांना अंकुश दिसावेत म्हणून त्याने मोबाईलचा कॅमेरा वारंवार त्यांच्या दिशेने फिरवला. आईने लगेच फोटो काढला का अशी विचारणा केली, पण तेव्हा फोटो घेतला नव्हता. तरीही घरच्यांना ही गोष्ट ऐकून खूप आनंद झाल्याचं त्याने सांगितलं.
हे पण वाचा.. कान्समध्ये नेहा पेंडसेचा ग्लॅमरस जलवा! तीन हटके लूक पाहून चाहते झाले फिदा
anup belwalkar meets ankush chaudhari fan moment
विशेष म्हणजे, सुरुवातीला अंकुश चौधरींसोबत फोटो काढण्यासाठी पुढे जाण्याचं धाडसच होत नव्हतं, अशी कबुलीही अनुपने दिली. मनात थोडी भीती आणि संकोच असल्यामुळे तो थांबून होता. शेवटी त्याचा मित्र ओमप्रकाशने त्याला प्रोत्साहन दिलं आणि निघताना त्याने अंकुश चौधरींसोबत भेट घेत फोटो काढला. त्यानंतर दोघांमध्ये थोड्या गप्पाही झाल्या आणि अंकुश चौधरींनी त्याला मिठी मारल्याचंही त्याने सांगितलं.
हे पण वाचा.. काही लोक ट्रोल करतात…” पतीसोबत फोटो शेअर न करण्यामागचं कारण अभिनेत्री जान्हवी किल्लेकरने स्पष्टच सांगितलं
हा अनुभव अनुपसाठी अत्यंत खास ठरला असून त्याने तो आनंद आपल्या कुटुंबीयांसोबत आणि मित्रांसोबतही शेअर केला. दरम्यान, “दीप-ज्योती” मालिकेत सध्या अनेक नवे ट्विस्ट पाहायला मिळत आहेत. त्यामुळे मालिकेच्या आगामी भागांमध्ये नेमकं काय घडणार याकडे प्रेक्षकांचं लक्ष लागून राहिलं आहे.
