mugdha godbole entry in tula japnar aahe serial new twist : “तुला जपणार आहे” ही झी मराठीवरील लोकप्रिय मालिका गेल्या काही महिन्यांपासून प्रेक्षकांचे विशेष लक्ष वेधून घेत आहे. मालिकेतील रहस्य, कौटुंबिक नात्यांमधील गुंतागुंत आणि सतत येणारे अनपेक्षित ट्विस्ट यामुळे ही मालिका चर्चेत असते. आता या मालिकेत आणखी एक मोठा बदल पाहायला मिळणार असून अभिनेत्री मुग्धा गोडबोले रानडे यांची दमदार एन्ट्री होणार आहे. मालिकेचा नवीन प्रोमो समोर आल्यानंतर प्रेक्षकांमध्ये उत्सुकता अधिकच वाढली आहे.
मालिकेच्या कथानकात मंजिरी हे पात्र स्वतःला चिरतरुण ठेवण्यासाठी कोणत्याही थराला जात असल्याचे दाखवण्यात आले आहे. तिच्या स्वार्थासाठी तिने अनेकांचे जीव घेतले असून रामपुरे कुटुंबातील अनेक रहस्यांमागे तिचाच हात असल्याचे हळूहळू स्पष्ट होत आहे. दादासाहेब रामपुरे यांच्या आयुष्यात येऊन तिने संपूर्ण घरावर आपले नियंत्रण मिळवले. एवढेच नाही, तर मीरा आणि अंबिकाच्या आयुष्याशी संबंधित अनेक धक्कादायक गोष्टीदेखील तिच्यामुळे घडल्या.
अंबिकाचा मृत्यू झाल्यानंतर तिचा आत्मा घरात वावरत असल्याचे कथानकात दाखवण्यात आले आहे. विशेष म्हणजे अंबिका फक्त मीरा आणि मंजिरीलाच दिसते. त्यामुळे मालिकेतील रहस्य आणखी गडद झाले आहे. मीरालादेखील मंजिरीचे खरे रूप माहिती आहे, मात्र तिच्यावर कोणीच विश्वास ठेवत नसल्याने ती एकटी पडलेली दिसते. अथर्वसोबतचे तिचे नातेही यामुळे तणावपूर्ण झाले आहे.
काही दिवसांपूर्वी मालिकेत दादासाहेबांना मंजिरीचे सत्य समजल्याचा भाग दाखवण्यात आला होता. मात्र हे सत्य बाहेर येण्याआधीच त्यांचा मृत्यू झाला. त्यामुळे मालिकेत मोठा भावनिक आणि रहस्यमय वळण आले. आता या सगळ्या घटनांनंतर मालिकेत आणखी एका आत्म्याची एन्ट्री होणार असल्याचे नव्या प्रोमोमध्ये दिसून आले आहे.
समोर आलेल्या प्रोमोमध्ये माया आणि तिच्या कुटुंबीयांकडून आत्म्याला बोलावण्याचा प्रयत्न केला जातो. मात्र त्यांच्या समोर प्रकट होणारा आत्मा दादासाहेबांचा नसून एका महिलेचा असतो. त्या आत्म्याला पाहून सर्वजण घाबरून जातात. त्याच वेळी मीरा तिथे येऊन “आई” असे म्हणते आणि प्रेक्षकांना मोठा धक्का बसतो. याच भूमिकेत अभिनेत्री मुग्धा गोडबोले रानडे दिसणार आहेत.
हे पण वाचा.. तारिणी मालिकेत नव्या ऑफिसरची एंट्री; केदारच्या आयुष्यातील ‘रेवा’ समोर येताच कथानकाला नवा ट्विस्ट
mugdha godbole entry in tula japnar aahe serial new twist
मुग्धा गोडबोले यांनी सोशल मीडियावर पोस्ट शेअर करत मालिकेत सहभागी होत असल्याची माहिती दिली आहे. त्यांच्या एन्ट्रीनंतर कथानकाला नवे वळण मिळणार असल्याचे मानले जात आहे. आता मीराची आई परत आल्यानंतर मंजिरीचे सत्य अखेर सर्वांसमोर येणार का, अंबिका आणि मीरा एकत्र येऊन मंजिरीचा पर्दाफाश करणार का, याची उत्सुकता प्रेक्षकांना लागली आहे.
हे पण वाचा.. अभिनेत्री धनश्री काडगावकरची स्टार प्रवाहवरील मालिकेत एन्ट्री
“तुला जपणार आहे” मालिकेतील आगामी भागांमध्ये रहस्य, भावनिक प्रसंग आणि थरार यांचा जबरदस्त संगम पाहायला मिळणार असल्याचे स्पष्ट झाले आहे.
