tarini jj yuvraj atak navin twist : ‘तारिणी’ ही झी मराठीवरील लोकप्रिय मालिका सध्या रहस्य, अॅक्शन आणि कौटुंबिक नाट्य यांच्या अनोख्या संगमामुळे प्रेक्षकांची विशेष पसंती मिळवत आहे. प्रत्येक भागात उलगडणारी नवी रहस्ये आणि तपासातील धक्कादायक घडामोडी यामुळे मालिकेची उत्कंठा दिवसेंदिवस वाढत आहे. आता समोर आलेल्या नव्या प्रोमोमुळे कथानकात आणखी एक मोठे वळण येणार असल्याचे स्पष्ट झाले आहे.
अलीकडेच मालिकेत अभिनेत्री मानसी कुलकर्णी यांनी जया जगदाळे उर्फ JJ या भूमिकेत दमदार एन्ट्री केली आहे. कर्तव्यनिष्ठ, धाडसी आणि निर्णयक्षम अधिकारी म्हणून त्यांची व्यक्तिरेखा साकारण्यात आली आहे. सुरुवातीपासूनच JJ आपल्या वेगळ्या कामकाजाच्या पद्धतीमुळे लक्ष वेधून घेत आहे. आता तिची हीच धाडसी शैली थेट खांडेकर कुटुंबासमोर पाहायला मिळणार आहे.
नव्या प्रोमोमध्ये खांडेकर कुटुंबात एका कार्यक्रमाचे वातावरण दिसते. त्याचवेळी JJ आपल्या संपूर्ण टीमसह तिथे पोहोचते आणि अचानक सुरू झालेल्या चौकशीमुळे उपस्थित सर्वजण आश्चर्यचकित होतात. ती युवराजला समोर बोलावते आणि रेव्ह पार्टी प्रकरणात पकडलेल्या गुलाबचा फोटो दाखवून त्याची ओळख विचारते. मात्र युवराज त्याला ओळखत नसल्याचे सांगतो. त्यानंतर JJ कुटुंबातील इतर सदस्यांनाही तोच प्रश्न विचारते.
या चौकशीदरम्यान सर्वात महत्त्वाचा क्षण तेव्हा येतो, जेव्हा JJ तारिणीला गुलाबला यापूर्वी कधी पाहिलं आहे का, असा प्रश्न विचारते. त्यावर तारिणी शांतपणे पण ठामपणे उत्तर देते की तिने गुलाबला युवराजच्या खोलीत पाहिले होते. तिच्या या विधानाने संपूर्ण खांडेकर कुटुंब हादरून जाते. या जबाबानंतर JJ तातडीने युवराजला अटक करण्याचा निर्णय घेते.
प्रोमोमध्ये युवराजची आई त्याला वाचवण्याचा प्रयत्न करताना दिसते. मात्र JJ आपल्या अधिकाराचा वापर करत परिस्थिती नियंत्रणात आणते आणि युवराजला ताब्यात घेते. या दृश्यामुळे आगामी भागात तपासाला नवे वळण मिळणार असल्याचे स्पष्ट संकेत मिळत आहेत.
हे पण वाचा.. तारिणी मध्ये मानसी कुलकर्णीची दमदार एन्ट्री; टीमची नवी बॉस ‘JJ’ कोण, जाणून घ्या तिच्या भूमिकेबद्दल
दरम्यान, हा प्रोमो सोशल मीडियावर मोठ्या प्रमाणात व्हायरल झाला असून प्रेक्षकांनी त्यावर उत्स्फूर्त प्रतिक्रिया दिल्या आहेत. अनेकांनी “आता खरी मजा येणार”, “खेळ आता रंगणार”, “हा ट्विस्ट खूपच इंटरेस्टिंग आहे” अशा प्रतिक्रिया नोंदवल्या आहेत. काही प्रेक्षकांनी कथानकातील पुढील घडामोडींवरही अंदाज व्यक्त केला आहे. विशेषतः कौशिकी आता सत्याची साथ देणार की युवराजची बाजू घेणार, याबाबत चाहत्यांमध्ये उत्सुकता निर्माण झाली आहे.
आता ‘तारिणी’ मालिकेच्या आगामी भागात युवराजवरील आरोप कितपत सिद्ध होतात, तारिणीच्या जबाबामुळे तपास कोणत्या दिशेने पुढे सरकतो आणि JJ पुढे आणखी कोणते निर्णय घेते, याकडे प्रेक्षकांचे लक्ष लागले आहे. वाढत्या रहस्यामुळे मालिकेची रंगत आणखी वाढणार, हे मात्र निश्चित.
हे पण वाचा.. ठरलं तर मग मध्ये सायलीच्या डोहाळ्यांना सुरुवात; अर्जुनने प्रेमाने बनवले लाडू, अॅलर्जीमुळे घरात रंगला मजेशीर प्रसंग
