mrunal dusanis stress meditation life struggle : मालिकांमध्ये नेहमी शांत, संयमी आणि साध्या स्वभावाच्या भूमिकांमधून प्रेक्षकांची मनं जिंकणारी मृणाल दुसानिस खऱ्या आयुष्यात मात्र एका काळात प्रचंड मानसिक तणावातून जात होती. पडद्यावर कायम हसतमुख दिसणाऱ्या या अभिनेत्रीने नुकत्याच दिलेल्या मुलाखतीत तिच्या आयुष्यातील त्या कठीण दिवसांबद्दल खुलासा केला. स्वतःला सावरण्यासाठी तिने मेडिटेशनचा आधार घेतल्याचं मृणालने सांगितलं आहे.
मराठी मालिकाविश्वात स्वतःची वेगळी ओळख निर्माण करणारी मृणाल सध्या ‘लग्नानंतर होईलच प्रेम’ या मालिकेमुळे चर्चेत आहे. तिच्या सहज अभिनयाबरोबरच शांत आणि जमिनीवर राहणारा स्वभाव चाहत्यांना कायम भावतो. सोशल मीडियावरही अनेकदा चाहते तिच्या साधेपणाचं कौतुक करताना दिसतात. मात्र प्रत्येकाच्या आयुष्यात काही टप्पे असे येतात, जेव्हा मानसिक ताण आणि चिंता यांचा सामना करावा लागतो. मृणाललाही अशाच परिस्थितीतून जावं लागलं होतं.
एका मुलाखतीदरम्यान तिने तिच्या घराची सफर घडवताना पुस्तकांविषयीची आवड सांगितली. घरातील बुकशेल्फ दाखवत मृणाल म्हणाली की, तिला विविध विषयांवरील पुस्तकं वाचायला आवडतात. आत्मचरित्रं, साहित्य, अध्यात्म अशा अनेक प्रकारच्या पुस्तकांचा तिच्या संग्रहात समावेश आहे. सध्या ती दिवंगत अभिनेत्री स्मिता पाटील यांच्या आयुष्यावर आधारित पुस्तक वाचत असल्याचंही तिने सांगितलं.
याचवेळी मेडिटेशनशी तिचा संबंध कसा आला याबद्दलही अभिनेत्रीने मनमोकळेपणाने संवाद साधला. ती म्हणाली की, एका काळात ती खूप तणावाखाली होती आणि त्या परिस्थितीतून बाहेर पडणं तिला कठीण जात होतं. मानसिक शांततेसाठी तिने ‘भावातीत ध्यान’ हा मेडिटेशनचा प्रकार शिकला. महर्षी महेश योगी यांच्या विचारांपासून प्रेरित होऊन तिने ध्यान करण्यास सुरुवात केली होती. त्यावेळी मेडिटेशनने तिला मानसिक स्थैर्य मिळवून देण्यास मदत केली.
मृणालने पुढे सांगितलं की, आई झाल्यानंतर आयुष्य पूर्णपणे बदललं आहे. दोन वर्षांच्या मुलाची आई असल्यामुळे स्वतःसाठी वेळ काढणं कठीण होतं. “आता दोन मिनिटं डोळे बंद करून शांत बसणंसुद्धा अवघड होतं,” असं ती हसत म्हणाली. त्यामुळे पुन्हा एकदा मेडिटेशन आणि त्या संबंधित पुस्तकांकडे वळण्याची वेळ आल्याचंही तिने नमूद केलं.
हे पण वाचा.. संजय दत्तांच्या ‘अफजलखान’ लूकने दिशा परदेशी घाबरली; ‘राजा शिवाजी’च्या सेटवरील अनुभव केला शेअर
mrunal dusanis stress meditation life struggle
अभिनेत्रीच्या या प्रामाणिक कबुलीमुळे अनेक चाहत्यांनी तिचं कौतुक केलं आहे. मानसिक ताण, चिंता आणि स्वतःला सावरण्याचा संघर्ष हा प्रत्येकाच्या आयुष्यातील वास्तव भाग आहे. प्रसिद्धीच्या झोतात असणाऱ्या कलाकारांनाही अशा परिस्थितीचा सामना करावा लागतो, हे मृणालच्या अनुभवातून पुन्हा एकदा समोर आलं आहे.
हे पण वाचा.. राकेश बापट–तेजश्री प्रधान लग्न..?; अभिनेता आणि कुटुंबाचा मोठा खुलासा
