झी मराठीवरील लोकप्रिय मालिका ‘Veen Doghantali Hi Tutena’ सध्या प्रेक्षकांमध्ये प्रचंड चर्चेत आहे. सुरुवातीला एकमेकांशी सतत भांडणाऱ्या समर आणि स्वानंदी यांच्या नात्यात आता मोठा बदल दिसू लागला आहे. गैरसमज आणि टोमण्यांनी भरलेल्या या नात्याने आता मैत्रीचा सुंदर टप्पा गाठला आहे, ज्यामुळे कथानक अधिक रंजक बनले आहे.
लग्नानंतर हळूहळू समर आणि स्वानंदी एकमेकांना समजून घेऊ लागले. त्यांच्या स्वभावातील बारकावे लक्षात घेत त्यांनी नातं जपण्याचा प्रयत्न केला. विशेष म्हणजे, समर आणि त्याचा जवळचा मित्र आनंद यांच्यात निर्माण झालेला गैरसमज दूर करण्यासाठी स्वानंदीने घेतलेली पुढाकारही प्रेक्षकांच्या पसंतीस उतरली. यामुळे समर आणि स्वानंदी यांच्यातील विश्वास आणखी मजबूत झाला.
हे पण वाचा.कमळी मालिकेत धक्कादायक वळण! आजीचा संताप, कमळीला घराबाहेर हाकललं
मात्र, या सगळ्यात मल्लिका पुन्हा एकदा नकारात्मक भूमिका बजावताना दिसत आहे. समर आणि स्वानंदीचे नाते बिघडवण्यासाठी ती सतत नवे डाव आखत आहे. नुकत्याच समोर आलेल्या प्रोमोमध्ये तिच्या कारस्थानाची झलक पाहायला मिळते. समर आपल्या औषधांवर अवलंबून असल्याचे स्पष्ट होते आणि हाच मुद्दा मल्लिका आपल्या फायद्यासाठी वापरताना दिसते.
समरच्या अनुपस्थितीत ती त्याच्या औषधांचा बॉक्स लपवते आणि त्याचवेळी तिच्या मुलांच्या मदतीने आणखी एक धोकादायक योजना रचते. पेस्ट कंट्रोलच्या नावाखाली समरच्या खोलीत विषारी धूर पसरवला जातो. त्यातून बाहेर येताना समरला श्वास घेण्यास त्रास होतो आणि औषधे सापडत नसल्याने तो बेशुद्ध पडतो.
या प्रसंगाच्या शेवटी स्वानंदी जेव्हा खोलीत प्रवेश करते, तेव्हा तिच्या चेहऱ्यावरचा धक्का प्रेक्षकांच्या मनातही ताण निर्माण करतो. आता पुढे काय होणार, स्वानंदी वेळेत समरला वाचवेल का, आणि मल्लिकेचा हा कट उघडकीस येईल का, याकडे सर्वांचे लक्ष लागले आहे. ‘Veen Doghantali Hi Tutena’ मधील हा नवीन ट्विस्ट मालिकेला आणखी रोमांचक वळण देणार आहे.
