‘Tharala Tar Mag’ मालिकेत प्रेक्षकांना भावनिक ते थरारक अशी अनुभूती देणारा नवा अध्याय सुरू होणार आहे. सुभेदारांच्या घरातील शांत वातावरणात आता मोठा हलकल्लोळ उडण्याची चिन्हं दिसत आहेत. नुकतंच सायलीला एक धक्कादायक सत्य कळालं—ज्यांना ती इतके दिवस आई-वडील मानत होती, ते सदाशिव आणि मैनावती तिचे खरे मायबापच नाहीत. हे सत्य मधुभाऊंकडून समजताच सायली आणि अर्जुन दोघेही हादरून गेले.
याच वेळी सदाशिव आणि मैनावती यांनी पूर्णा आजीच्या कॉफीत गुंगीचं औषध टाकून सुभेदारांच्या घरात चोरी करण्याचा प्रयत्न केल्याचाही भांडाफोड झाल्याने त्यांना घराबाहेर काढण्याची वेळ येते. अर्जुनला मात्र या सत्यामुळे एक दिलासा मिळतो—सायली चुकीच्या माणसांच्या छत्राखाली वाढली नसावी. आता तिच्या खऱ्या आई-वडिलांचा शोध घेणं ही मोठी जबाबदारी त्याच्यावर येत आहे.
या सर्व घडामोडींमध्ये सायली आणि प्रतिमाचं नातं आणखी घट्ट होत जातं. देवीचं दर्शन घेण्यासाठी दोघी एकत्र मंदिरात गेल्यावर कथानकाला नवा मोड मिळतो. यावेळी सायली फोनवर बोलत असताना अचानक प्रतिमा जोरात किंचाळून बेशुद्ध पडते. हे पाहून सायली हादरते. प्रतिमेला नेमकं काय झालं? हा प्रश्न सर्वांच्या मनात घर करून बसतो.
प्रतिमा का घाबरली याचं कारण पुढे येतं—मंदिरात तिला महिपत दिसतो. देवीसमोर पंचारती धरून उभ्या असलेल्या महिपतला पाहताच प्रतिमाच्या डोळ्यासमोर तिचा भयानक भूतकाळ उभा राहतो. अपघाताची काळोखी रात्र तिला पुन्हा एकदा आठवते. जाब देण्यासाठी ती पुढे सरकते, तेवढ्यात महिपत तिच्यासमोर पंचारतीची ज्वाला पुढे करत तिला दडपवण्याचा प्रयत्न करतो आणि प्रतिमा भीतीने बेशुद्ध पडते.
यामुळे सायलीच्या मनात एक नवा संशय निर्माण होतो—प्रतिमा महिपतला पाहूनच तर घाबरली नाही? आता हे रहस्य उलगडण्याचा निर्धार सायली करते आणि मालिकेला एका रोमांचक वळणाची सुरुवात होते. ‘Tharala Tar Mag’ चा हा विशेष भाग २३ आणि २४ तारखेला रात्री ८:३० वाजता प्रसारित होणार असून प्रेक्षकांना नवा थरारक अनुभव मिळणार आहे.
