Tejaswini Lonari Wedding : मराठी मनोरंजन विश्वात सध्या लग्नाचा हंगाम रंगात आला आहे आणि या उत्सवी वातावरणात अभिनेत्री तेजस्विनी लोणारीचं (Tejaswini Lonari Wedding) लग्न समोर आल्यानंतर चाहत्यांमध्ये उत्सुकता आणखी वाढली आहे. अनेक दिवसांपासून तेजस्विनीच्या लग्नाची चर्चा सुरू होती. शेवटी तिच्या आयुष्यातील हा खास दिवस उजाडला आणि तिच्या विवाहाचा पहिला फोटो समोर येताच सोशल मीडियावर शुभेच्छांचा पाऊस पडू लागला.
शिवसेना नेते सदा सरवणकर यांचे सुपुत्र आणि युवानेते समाधान सरवणकर यांच्यासोबत तेजस्विनीने विवाहबंधनात अडकत आयुष्याची नवी सुरुवात केली आहे. मुंबईतील ‘मुंबई सहारा’ या पंचतारांकित हॉटेलमध्ये अत्यंत शाही आणि पारंपरिक सोहळ्यात हा विवाह पार पडला. कुटुंबीय, नातेवाईक आणि काही निवडक पाहुण्यांच्या उपस्थितीत झालेल्या या समारंभाला सौंदर्य, साधेपणा आणि दिमाखाची उत्तम सांगड पाहायला मिळाली.
यापूर्वी तेजस्विनीचा हळदी समारंभ जल्लोषात पार पडला होता. समाधान सरवणकर यांच्या नावाची हळद तेजस्विनीला लावण्यात आली आणि त्या सोहळ्याचे सुंदर फोटो व्हायरल झाले. तेजस्विनीने हळदीसाठी पारंपरिक पिवळी साडी नेसली होती आणि तिच्या देखण्या रूपाची चर्चा सोशल मीडियावर भरभरून झाली.
लग्नाच्या दिवशी तेजस्विनीने गुलाबी रंगाची भरजरी साडी नेसत राजेशाही लूक साकारला होता. नाजूक दागिने आणि आकर्षक हेअरस्टाइलमुळे तिच्या सौंदर्यात अधिकच भर पडली. समाधान यांनीदेखील पारंपरिक वेशभूषेत उपस्थित राहून सोहळ्याला साजेशी शोभा आणली. विवाहानंतर दोघांच्या नव्या प्रवासाला कलाविश्वातील सहकाऱ्यांकडून आणि चाहत्यांकडून शुभेच्छांचा वर्षाव होत आहे.
गत ऑक्टोबर महिन्यात दोघांचा साखरपुडा पार पडला होता आणि त्या कार्यक्रमाचे फोटोही प्रचंड चर्चेत होते. दोन महिन्यांच्या आतच हा सुंदर संबंध विवाहबंधनात रूपांतरित झाला आहे. आता तेजस्विनी लोणारी सरवणकर कुटुंबाची सून झाली असून तिच्या नव्या आयुष्याबद्दल सर्वांकडून सदिच्छा व्यक्त केल्या जात आहेत.
