shashank ketkar on god faith and blind devotion : मराठी मनोरंजनविश्वातील लोकप्रिय अभिनेता शशांक केतकर पुन्हा एकदा आपल्या स्पष्ट आणि रोखठोक वक्तव्यामुळे चर्चेत आला आहे. अभिनयासोबतच सामाजिक आणि वैयक्तिक विषयांवर थेट मत मांडण्याची त्याची शैली प्रेक्षकांना नेहमीच भावते. यावेळी त्याने देवावरील श्रद्धा, अंधभक्ती आणि माणसाची स्वतःची जबाबदारी या विषयावर अत्यंत प्रामाणिकपणे भाष्य केलं आहे.
सध्या स्टार प्रवाहवरील ‘मुरांबा’ मालिकेतून प्रेक्षकांच्या भेटीला येणाऱ्या शशांकने नुकत्याच दिलेल्या एका मुलाखतीत आपल्या श्रद्धेविषयी मनमोकळं बोलणं केलं. “मी अभिमानी हिंदू आहे, पण अंधभक्त नाही,” असं स्पष्ट सांगत त्याने श्रद्धा आणि अंधश्रद्धा यामधला फरकही अधोरेखित केला.
मुलाखतीदरम्यान त्याला देवावर किती विश्वास आहे, असा प्रश्न विचारण्यात आला होता. त्यावर उत्तर देताना शशांक म्हणाला की, आयुष्यात घडणाऱ्या चांगल्या किंवा वाईट गोष्टींसाठी तो स्वतःलाच जबाबदार मानतो. “जर माझ्या कामाचं कौतुक होत असेल, तर त्याचं श्रेय मी घेतो. मग चुकीचं काही घडलं तर त्यासाठी देवाला दोष देणं योग्य नाही,” असं त्याने सांगितलं. माणसाचे निर्णय, त्याचे अंदाज आणि वागणं यावरच आयुष्याच्या अनेक गोष्टी अवलंबून असतात, असं मतही त्याने व्यक्त केलं.
शशांकच्या मते, कठीण प्रसंगात किंवा मन अस्वस्थ असताना देवासमोर हात जोडल्याने मानसिक आधार मिळतो. मात्र, दिवसाची सुरुवात फक्त देव-देव करण्यात किंवा प्रत्येक गोष्ट अंधपणे मानण्यात त्याचा विश्वास नाही. “श्रद्धा असणं वेगळं आणि अंधभक्त होणं वेगळं,” असं तो म्हणाला. त्याचबरोबर देवाचा अपमान सहन करणार नाही, अशी भूमिकाही त्याने स्पष्ट केली.
आपल्या दैनंदिन आयुष्याबद्दल बोलताना शशांकने एक साधा पण महत्त्वाचा दृष्टिकोन मांडला. घराबाहेर पडताना तो देवाला नमस्कार करतो आणि कुटुंब सुखरूप राहावं, प्रवास चांगला व्हावा एवढीच प्रार्थना करतो. “देवावर आधीच जगाचा खूप भार आहे, मी माझं अतिरिक्त ओझं त्याच्यावर टाकणार नाही,” असं तो विनोदी शैलीत म्हणाला.
हे पण वाचा.. मालदीव्समध्ये प्रिया बापटचा बोल्ड आणि स्टायलिश लूक; उमेश कामतसोबतचे फोटो सोशल मीडियावर व्हायरल
shashank ketkar on god faith and blind devotion
शशांक केतकरच्या या वक्तव्यामुळे सोशल मीडियावरही विविध प्रतिक्रिया उमटताना दिसत आहेत. अनेकांनी त्याच्या स्पष्टवक्तेपणाचं कौतुक केलं असून श्रद्धेबाबतचा त्याचा संतुलित दृष्टिकोन योग्य असल्याचं मत व्यक्त केलं आहे. मनोरंजनविश्वातील कलाकार केवळ अभिनयापुरते मर्यादित राहत नाहीत, तर समाजातील अनेक विषयांवर आपली भूमिका मांडत असतात. शशांकने मांडलेले विचारही याचाच एक भाग मानले जात आहेत.
हे पण वाचा.. मराठी मालिकेत मोठा ट्विस्ट! निकालाच्या दिवशी शिक्षणमंत्र्यांची दमदार एन्ट्री; कमळी नापास होऊन गावाला जाणार?
