Actor Pratik Deshmukh Engagement : मराठी मनोरंजनविश्वात सध्या एका सुंदर सोहळ्याची चर्चा रंगली आहे. प्रसिद्ध गायक सुदेश भोसले यांच्या कन्या श्रुती भोसले हिचा साखरपुडा लोकप्रिय अभिनेता प्रतीक देशमुख याच्याशी झाला असून या दोघांच्या साखरपुड्याचे फोटो सोशल मीडियावर धुमाकूळ घालत आहेत. या बातमीमुळे चाहत्यांमध्ये आनंदाचं वातावरण आहे.
हा साखरपुडा अगदी पारंपरिक आणि आनंदी वातावरणात, केवळ जवळच्या नातेवाईकांच्या उपस्थितीत पार पडला. श्रुती आणि प्रतीक यांनी त्यांच्या आयुष्यातील या खास क्षणाचे काही सुंदर फोटो चाहत्यांसोबत शेअर केले आहेत. या फोटोंमध्ये दोघेही सोनेरी रंगाच्या पोशाखात दिसत असून, श्रुतीने आकर्षक साडी नेसली होती, तर प्रतीकने पारंपरिक कुर्ता परिधान केला होता. फोटोंमध्ये दोघे एकमेकांना अंगठी घालताना आणि एकमेकांकडे प्रेमाने पाहताना दिसत आहेत. त्यांच्या चेहऱ्यावरचा आनंद आणि भावनिक क्षणांनी चाहत्यांची मने जिंकली आहेत.
श्रुती भोसलेने इन्स्टाग्रामवर पोस्ट केलेल्या फोटोंवर चाहत्यांकडून शुभेच्छांचा वर्षाव झाला आहे. मनोरंजन क्षेत्रातील अनेक कलाकारांनीही या नव्या जोडप्याचं अभिनंदन केलं आहे. विशेष म्हणजे अभिनेत्री तेजश्री प्रधान हिने आपल्या इन्स्टाग्राम स्टोरीवर त्यांचा फोटो शेअर करत लिहिलं, “प्रतीक, मी तुझ्यासाठी खूप खुश आहे.” तिच्या या प्रतिक्रियेमुळे चाहत्यांच्या चर्चेला आणखी रंग चढला आहे.
प्रतीक देशमुख हा केवळ अभिनेता नसून लेखक, निर्माता आणि अभियंता म्हणूनही ओळखला जातो. त्याने ‘शुभ लग्न सावधान’, ‘गोल गोल गरा गरा’, ‘जजमेंट’ आणि ‘अजूनी’ या लोकप्रिय मालिकांमधून आणि चित्रपटांमधून प्रेक्षकांची मने जिंकली आहेत. त्याचबरोबर त्याने अनेक जाहिरातींमध्येही काम केलं आहे.
Actor Pratik Deshmukh Engagement श्रुती आणि प्रतीक यांच्या साखरपुड्यामुळे मराठी मनोरंजनविश्वात सध्या आनंदाचे वातावरण आहे. या नव्या जोडप्याला चाहत्यांकडून आणि कलाकारांकडून शुभेच्छांचा वर्षाव होत असून, दोघांच्या लग्नाच्या तयारीबद्दलही आता चर्चेला सुरुवात झाली आहे.
