लखनऊ सुपर जायंट्सच्या निकोलस पूरनने ( Nicholas Pooran ) आपल्या आक्रमक फलंदाजीने सनरायझर्स हैदराबादविरुद्ध झालेल्या सामन्यात अक्षरशः वादळ उठवलं. राजीव गांधी आंतरराष्ट्रीय स्टेडियमवर खेळल्या गेलेल्या या सामन्यात पूरनने केवळ 18 चेंडूंमध्ये अर्धशतक ठोकत आयपीएल 2025 मधील आतापर्यंतची सर्वात वेगवान अर्धशतक झळकावली. या सामन्यात लखनऊने सनरायझर्सवर 5 गडी राखून विजय मिळवला आणि पूरनच्या तडाखेबाज खेळीमुळे त्याच्या नावावर तब्बल 5 नवे विक्रम जमा झाले.
Table of Contents
Nicholas Pooran चा ‘स्फोटक’ फॉर्म, SRH च्या गोलंदाजांची दाणादाण
सनरायझर्स हैदराबादने प्रथम फलंदाजी करत 20 षटकांत 190 धावांचा मजबूत स्कोअर उभारला. प्रत्युत्तरात लखनऊने 16.1 षटकांतच 5 गड्यांच्या मोबदल्यात विजय मिळवला. या विजयात पूरनने निर्णायक भूमिका बजावत केवळ 18 चेंडूंत अर्धशतक ठोकलं. आयपीएलच्या इतिहासात लखनऊ सुपर जायंट्ससाठी ही दुसऱ्या क्रमांकाची सर्वात वेगवान अर्धशतकी खेळी होती. विशेष म्हणजे, लखनऊसाठी आतापर्यंतची सर्वात वेगवान अर्धशतक झळकावण्याचा विक्रम देखील पूरनच्याच नावावर आहे. त्याने 2023 मध्ये आरसीबीविरुद्ध अवघ्या 15 चेंडूंमध्ये अर्धशतक झळकावले होते.
600+ षटकार ठोकणारा जगातील चौथा फलंदाज Nicholas Pooran
निकोलस पूरनच्या या खेळीमुळे त्याच्या कारकिर्दीत आणखी एक महत्त्वाचा विक्रम जमा झाला. तो टी20 क्रिकेटमध्ये 600 पेक्षा जास्त षटकार ठोकणारा जगातील चौथा फलंदाज बनला आहे. याआधी हा पराक्रम केवळ तीन खेळाडूंनी केला होता – वेस्ट इंडिजचे महान फलंदाज ख्रिस गेल (1056 षटकार), कीरोन पोलार्ड (908 षटकार) आणि आंद्रे रसेल (733 षटकार). लखनऊच्या पहिल्या सामन्यातही पूरनने दिल्लीविरुद्ध 30 चेंडूंत 75 धावांची खेळी करत दमदार फॉर्मची झलक दाखवली होती.
LSG संघासाठी 1000 धावांचा टप्पा गाठणारा दुसरा फलंदाज
पूरनने या सामन्यात आणखी एक ऐतिहासिक टप्पा गाठला. लखनऊ सुपर जायंट्ससाठी 1000 धावा पूर्ण करणारा तो दुसरा फलंदाज ठरला आहे. त्याच्यापूर्वी केएल राहुलने हे यश मिळवत संघासाठी 1410 धावा केल्या होत्या. आयपीएलमधील त्याच्या कामगिरीकडे पाहता, पूरनने आतापर्यंत 78 सामने खेळले असून 167 च्या स्ट्राइक रेटने 1914 धावा केल्या आहेत.
IPL मधील ‘किंग’ बनला पूरन, 20 चेंडूंखाली 50+ धावा करणारा एकमेव फलंदाज
आयपीएलमध्ये 20 किंवा त्याहून कमी चेंडूंमध्ये 50+ धावा काढण्याचा पराक्रम पूरनने आतापर्यंत तब्बल 4 वेळा केला आहे. यामुळे तो हा विक्रम करणारा पहिला फलंदाज ठरला आहे. याआधी ट्रॅव्हिस हेड आणि जॅक फ्रेझर-मॅकगर्क यांनी तीनवेळा हा पराक्रम केला होता, मात्र पूरनने त्यांना मागे टाकत या यादीत अव्वल स्थान पटकावले.
75 डावांमध्ये सर्वाधिक षटकार ठोकणाऱ्या फलंदाजांच्या यादीत तिसऱ्या क्रमांकावर
निकोलस पूरनने ( Nicholas Pooran ) आयपीएलमध्ये आतापर्यंत 75 डावांमध्ये सर्वाधिक षटकार ठोकणाऱ्या फलंदाजांच्या यादीत तिसऱ्या क्रमांकावर झेप घेतली आहे. ख्रिस गेलने 221 षटकार, आंद्रे रसेलने 159 षटकार आणि पूरनने 140 षटकार ठोकले आहेत. विशेष म्हणजे, 2024 सालापासून सर्वाधिक टी20 षटकार ठोकण्याचा विक्रमही त्याने आपल्या नावे केला आहे. 86 डावांमध्ये त्याने 194 षटकार लगावले असून, हेनरिक क्लासेन (63 डावांमध्ये 118 षटकार) याला देखील मागे टाकले आहे.
निकोलस पूरनचा IPL 2025 मधील वर्चस्व Nicholas Pooran IPL Runs
निकोलस पूरनचा सध्याचा फॉर्म पाहता तो आयपीएल 2025 मध्ये सर्वाधिक धावा करणाऱ्या फलंदाजांमध्ये आघाडीवर जाऊ शकतो. लखनऊ सुपर जायंट्ससाठी तो एक महत्त्वाचा खेळाडू ठरत असून त्याच्या या आक्रमक खेळीमुळे संघाला विजयी सुरुवात मिळाली आहे. पूरनने आपला फॉर्म असाच कायम ठेवला, तर LSG संघासाठी हा हंगाम अत्यंत यशस्वी ठरू शकतो.
