आजकाल प्रत्येकाकडे स्मार्टफोन असतो, पण यात असलेल्या काही फिचर्सबद्दल अजूनही अनेक लोकांना योग्य माहिती नसते. त्यापैकी एक महत्त्वाचा फिचर म्हणजेच एअरप्लेन मोड. सायलेंट मोड किंवा डू नॉट डिस्टर्ब मोडबद्दल आपल्याला चांगलीच माहीत आहे, पण मोबाईल मध्ये एअरप्लेन मोड नक्की का असतो आणि त्याचा वापर केव्हा आणि कसा करायचा हे अनेकांना माहित नाहीये.

मी पण आधी विचार करत होतो की, हा फिचर नेमका का दिला जातो? पण जेव्हा मी याचा सखोल अभ्यास केला, तेव्हा समजलं की हा एक अत्यंत महत्त्वाचा आणि उपयोगी फिचर आहे. चला तर मग, आज मी तुम्हाला एअरप्लेन मोडबद्दल सविस्तर माहिती सांगतो.

एअरप्लेन मोड म्हणजे नक्की काय आहे?

जर तुम्ही कधी स्मार्टफोनच्या सेटिंग्जमध्ये पाहिलं असेल, तर तुम्हाला एअरप्लेन मोड हा ऑप्शन नक्कीच दिसला असेलच. हा मोड सुरू केल्यावर तुमच्या फोनमधील मोबाइल नेटवर्क, वाय-फाय, ब्लूटूथ आणि GPS सारख्या सेवा तात्पुरत्या बंद होतात. म्हणजेच, या मोडमध्ये असताना तुम्ही कोणालाही फोन करू शकत नाही किंवा कोणाचा कॉलही स्वीकारू शकत नाही.

फ्लाइटमध्ये एअरप्लेन मोड का आवश्यक असतो?

जर तुम्ही कधी विमानाने प्रवास केला असेल, तर तुम्हाला विमानामध्ये बसल्यानंतर फोन एअरप्लेन मोडवर टाका असं सांगितलं गेलं असेल. पण हे सांगण्यामागे एक महत्त्वाचं कारण असतं.

विमान उड्डाण करत असताना पायलट रडार आणि कंट्रोल रूमच्या संपर्कामध्ये असतो. अशावेळी जर सगळ्या प्रवाशांचे मोबाइल नेटवर्क सुरू असेल, तर ते विमानाच्या कम्युनिकेशन सिस्टीममध्ये अडथळा निर्माण करू शकतं. त्यामुळे पायलटला योग्य सूचना ऐकण्यात अडचण येऊ शकते. म्हणूनच फ्लाइट टेक-ऑफ आणि लँडिंगच्या वेळी फोन एअरप्लेन मोडवर ठेवण्याचा सल्ला दिला जातो.

एअरप्लेन मोडचे इतर उपयोग

एअरप्लेन मोड फक्त फ्लाइटमध्येच उपयोगी नसतो, तर दैनंदिन वापरासाठीसुद्धा हा फिचर खूपच उपयोगी आहे. मी स्वतः अनेक वेळा हा फिचर वापरतो आणि मला तो खूप महत्त्वाचा आणि उपयोगी वाटतो. चला तर त्याचे काही उपयोग जाणून घेऊयात.

1. नेटवर्क समस्या सोडवण्यासाठी मदत:

जर तुमच्या फोनमध्ये नेटवर्क येत नसेल, तर काही सेकंदांसाठी एअरप्लेन मोड सुरू करून नंतर बंद करा. यामुळे नेटवर्क रीफ्रेश होईल आणि अनेकदा यामुळे नेटवर्क येत नसल्याची समस्या सोडवली जाते.

2. बॅटरी वाचवण्यासाठी:

जर तुम्ही एखाद्या अशा ठिकाणी असाल जिथे नेटवर्क येत नसेल, तर फोन सतत सिग्नल शोधत राहतो आणि याचमुळे बॅटरी झपाट्याने कमी होऊ लागते. अशावेळी फोन एअरप्लेन मोडवर ठेवल्यास बॅटरी बराच काळ टिकते.

3. डिस्टर्बन्स टाळण्यासाठी:

काही वेळा आपल्याला फक्त फोन वापरायचा असतो पण कोणाचेही फोन किंवा मेसेजेस नको असतात, अशावेळी एअरप्लेन मोड चालू केल्याने कोणताही त्रास किंवा दुसऱ्या कामात अडथळा येत नाही.

4. चार्जिंग लवकर होण्यासाठी:

ही एक खूपच उपयोगी ट्रिक आहे. जर तुम्हाला फोन पटकन चार्ज करायचा असेल, तर चार्जिंगच्या वेळी एअरप्लेन मोड सुरू करा. यामुळे बॅटरीचा अनावश्यक वापर होत नाही आणि फोन लवकरात लवकर चार्ज होतो.

एअरप्लेन मोडमध्ये इंटरनेट कसे वापरता येईल?

तुम्हाला हे माहीत आहे का? एअरप्लेन मोड सुरू असतानाही वाय-फाय आणि ब्लूटूथ वापरता येतं. जर तुम्ही एअरप्लेन मोड ऑन केलात आणि नंतर वाय-फाय किंवा ब्लूटूथ परत सुरू केले, तर तुम्ही त्याचा वापर देखील करू शकता. म्हणजेच, विमानप्रवासातसुद्धा तुम्ही वाय-फाय असलेल्या फ्लाइटमध्ये इंटरनेट वापरू शकता.

तर आता तुम्हाला समजलंच असेल की एअरप्लेन मोड केवळ विमान प्रवासापुरता मर्यादित नाही तर हा एक उपयुक्त आणि स्मार्ट फीचर आहे, जो तुमच्या फोनचा परफॉर्मन्स सुधारू शकतो आणि अनेक समस्या देखील सोडवू शकतो. त्यामुळे तुम्हीही वेळोवेळी एअरप्लेन मोडचा योग्य वापर नक्कीच करून पहा.

आशा आहे की हा लेख वाचून तुम्हाला एअरप्लेन मोडबद्दल संपूर्ण माहिती मिळाली असेल. तुम्हाला हा लेख कसा वाटला ते आम्हाला नक्की कळवा! धन्यवाद.