Laapataa Ladies वादात! लेखक बिप्लब गोस्वामींचा ठाम प्रतिवाद, लेखक ठाम मत एकेक शब्द माझा आहे!
Table of Contents
मुंबई : दिग्दर्शिका किरण राव यांच्या ‘Laapataa Ladies’ या चित्रपटावर सध्या सोशल मीडियावर जोरदार चर्चा सुरू आहे. याचे कारण म्हणजे या हिंदी चित्रपटातील अनेक दृश्ये अरेबिक लघुपट ‘burqa city’शी मिळतीजुळती असल्याचा काही प्रेक्षकांचा दावा. सोशल मीडियावर एक व्हिडिओ व्हायरल झाला असून, त्यात दोन्ही चित्रपटांतील साम्य दाखवण्यात आलं आहे. यावरून काही नेटिझन्सनी ‘लपता लेडीज’वर चोरीचा आरोप लावला आहे.
Laapataa Ladies चे लेखक बिप्लब गोस्वामींचा ठाम प्रतिवाद
या वादावर आता ‘Laapataa Ladies’चे लेखक बिप्लब गोस्वामी यांनी अधिकृत प्रतिक्रिया दिली आहे. त्यांनी स्पष्टपणे सांगितले की, त्यांच्या कथेत कोणतीही चोरी नाही. त्यांनी ही कथा पूर्णपणे स्वतंत्रपणे आणि संशोधनावर आधारित लिहिली आहे. गोस्वामी म्हणाले की, त्यांनी ‘लपता लेडीज’ची प्राथमिक कथा ‘टू ब्राइड्स’ या नावाने ३ जुलै २०१४ रोजी स्क्रीनरायटर्स असोसिएशनकडे नोंदवली होती.
आपल्या अधिकृत निवेदनात बिप्लब गोस्वामी म्हणाले, “ही कथा मी अनेक वर्षांपासून विकसित केली आहे. २०१४ मध्येच मी संपूर्ण कथानकाचा तपशीलवार सारांश असोसिएशनमध्ये रजिस्टर केला होता. त्यामध्येच एक सीन आहे, ज्यात नवरा चुकीने दुसरी नववधू घरी घेऊन येतो आणि तिच्या चेहऱ्यावर पडलेल्या नकाबामुळे हा गोंधळ होतो. हाच क्षण संपूर्ण कथानकाची सुरुवात ठरतो.”
ते पुढे म्हणाले, “या नोंदणीकृत सारांशात पोलिस ठाण्यात जाऊन नवरा आपल्या हरवलेल्या पत्नीचा फोटो दाखवतो, आणि तिचा चेहरा नकाबामुळे झाकलेला असल्यामुळे तिथे हास्यजन्य प्रसंग निर्माण होतो – हेही दृश्य त्यातच लिहिलेले आहे. हे सारे घटक माझ्या मूळ संकल्पनेचा भाग आहेत.”
बिप्लब गोस्वामी यांनी हेही नमूद केले की, त्यांनी पूर्ण चित्रपटाचं पटकथालेखन २०१८ मध्ये केलं आणि त्याचीही नोंद केली होती. याच पटकथेवर त्यांना सिनेस्टान स्टोरीटेलर्स स्पर्धेत दुसऱ्या क्रमांकाचा पुरस्कार मिळाला होता.
‘burqa city’ दिग्दर्शकाचा Laapataa Ladies वर आरोप
‘बुर्का सिटी’ ( burqa city ) या अरेबिक लघुपटाचे दिग्दर्शक फॅब्रिस ब्राक यांनी एका मुलाखतीत सांगितले की, ‘लपता लेडीज’ पाहून ते थोडेसे आश्चर्यचकित झाले. त्यांच्यामते कथानकातील अनेक घटक त्यांच्या चित्रपटासारखे वाटले. उदाहरणार्थ, एक चांगुलपणा असलेला नवरा जो पत्नीच्या शोधात आहे, आणि दुसरा हिंसक नवरा – हे दोन्ही पात्र त्यांच्या लघुपटातही होते. पोलिस ठाण्यातला प्रसंग, दुकानदाराला फोटो दाखवण्याची घटना, आणि शेवटच्या ट्विस्टमध्ये पत्नीने स्वतःहून अत्याचारी पतीपासून पळ काढलेला – हे सारे ‘बुर्का सिटी’चे मुख्य कथानक होते, असे ब्राक यांनी म्हटले आहे.
यावर उत्तर देताना गोस्वामी म्हणाले, “माझी कथा कोणत्याही प्रकारे प्रेरित नाही. नकाब, चुकीची ओळख, पात्रांची अदलाबदल हे साहित्यप्रकारात अनेक शतकांपासून वापरले गेलेले आहेत. शेक्सपिअर, अलेक्झांडर ड्युमास, रवींद्रनाथ टागोर यांच्याही लेखनात हे आढळते. मी त्याच क्लासिकल शैलीचा वापर केला आहे, पण एक स्वतंत्र आणि भारतीय ग्रामीण पार्श्वभूमीवर आधारित कथा साकारली आहे.”
हे पण वाचा indian idol season 15 winner; कोण होणार विजेता? ९० च्या दशकाची रंगत, खास पाहुण्यांची उपस्थिती अन् सुरांची मेजवानी!
गोस्वामी यांनी हेही स्पष्ट केले की, ‘Laapataa Ladies’ मधील प्रत्येक पात्र, संवाद, घटना आणि सामाजिक संदेश हा त्यांच्या स्वतःच्या चिंतनातून, संशोधनातून आणि अनुभवातून उभा राहिलेला आहे. त्यांनी लिंगभेद, ग्रामीण सत्तासंरचना आणि पुरुषप्रधान मानसिकता यांचा सखोल अभ्यास केला आणि त्यातून ही कथा फुलवली.
“या आरोपांमुळे केवळ माझ्या लेखकीय परिश्रमांवरच नव्हे, तर संपूर्ण टीमच्या अथक मेहनतीवर प्रश्नचिन्ह उभं राहतं. माझी कथा १००% ओरिजिनल आहे. ही आरोपं पूर्णतः असत्य आहेत,” असा स्पष्ट शब्दांत त्यांनी आपली भूमिका मांडली.
गोस्वामी यांनी आपल्या निवेदनासोबत कथानक नोंदणीचे पुरावेही सोशल मीडियावर शेअर केले. त्याचं समर्थन करत किरण राव यांनीही गोस्वामी यांचं निवेदन इन्स्टाग्राम स्टोरीवर शेअर केलं आहे.
‘Laapataa Ladies’ १ मार्च २०२४ रोजी चित्रपटगृहांत प्रदर्शित झाला. यात स्पर्श श्रीवास्तव, प्रतिभा रांता, नितांशी गोयल आणि रवि किशन यांनी प्रमुख भूमिका साकारल्या आहेत. हा चित्रपट ग्रामीण भारतातील स्त्रियांच्या आत्मशोधावर आणि समाजातील स्त्री-पुरुष समानतेवरील भाष्य म्हणून ओळखला जातो.
दरम्यान, या वादात चित्रपटसृष्टीतील अनेकजण बिप्लब गोस्वामी यांच्या बाजूने उभे राहत आहेत, तर काही प्रेक्षक मात्र अद्यापही या साम्यांवर प्रश्न उपस्थित करत आहेत. चित्रपटाच्या विषयासारखाच हा वाद देखील सामाजिक भान आणि वैयक्तिक सर्जनशीलतेच्या सीमारेषा तपासणारा ठरत आहे.
