lagnanantar hoilch prem choti savi entry : ‘लग्नानंतर होईलच प्रेम”’ या लोकप्रिय मराठी मालिकेत सध्या कथानकाने एक वेगळेच वळण घेतले आहे. प्रेक्षकांना भावणाऱ्या या मालिकेत नव्या घडामोडींमुळे उत्सुकता अधिकच वाढली आहे. काही दिवसांपूर्वी मालिकेत पार्थ-काव्या आणि जीवा-नंदिनी या दोन जोडप्यांमध्ये निर्माण झालेले गैरसमज दूर झाले आणि त्यानंतर दोघांचेही लग्नसोहळे मोठ्या थाटामाटात पार पडले. लग्नानंतर त्यांचा संसार सुखाने सुरू झाल्याचे दाखवले गेले आणि हा ट्रॅक प्रेक्षकांच्या पसंतीस उतरला.
मात्र, कथानकात अचानक आलेल्या बदलामुळे मालिकेला भावनिक रंग चढला आहे. सध्या काव्याच्या आयुष्यात मातृत्वाची चाहूल लागलेली दाखवली आहे. पण तिच्या मनात अजूनही स्वतःच्या करिअर आणि स्वप्नांना प्राधान्य देण्याची इच्छा आहे. तिची मैत्रीण तिला पुन्हा अभ्यास आणि करिअरकडे वळण्याचा सल्ला देते, त्यामुळे काव्या एका मोठ्या द्विधा मनःस्थितीत सापडते. एका बाजूला तिच्या आयुष्यात आलेली नवीन जबाबदारी आणि दुसऱ्या बाजूला स्वतःची स्वप्नं—या संघर्षामुळे पार्थ आणि काव्यामध्ये मतभेदही निर्माण होताना दिसतात.
याच दरम्यान नंदिनीच्या आयुष्यात मात्र वेगळंच संकट उभं राहतं. तिला आई होण्याची प्रबळ इच्छा असते, पण वैद्यकीय अहवालात तिच्या मातृत्वाच्या शक्यता कमी असल्याचे स्पष्ट होते. या परिस्थितीत नंदिनी आणि जीवा दत्तक घेण्याचा विचार करतात. त्यांच्या आयुष्यातील ही भावनिक घालमेल प्रेक्षकांच्या मनाला भिडणारी आहे.
मालिकेच्या नव्या प्रोमोमध्ये एक हृदयस्पर्शी प्रसंग दाखवण्यात आला आहे. नंदिनी विचारात हरवून चालत असताना तिची भेट एका छोट्या मुलीशी होते. ही मुलगी तिला साबण विकत घेण्याची विनंती करते आणि तिच्याशी साधलेल्या संवादातून एक मोठा जीवनाचा संदेश देते—”१००% खात्री कशाचीच नसते.” या साध्या पण अर्थपूर्ण वाक्यामुळे नंदिनीला नव्याने आशा मिळते.
विशेष म्हणजे ही छोटी मुलगी म्हणजेच ‘छोटी सावी’ आहे, जिने यापूर्वी प्रेक्षकांची मनं जिंकली होती. या बालकलाकाराच्या एन्ट्रीमुळे मालिकेत नव्या उत्साहाची भर पडली आहे. तिच्या अभिनयामुळे कथानकाला एक वेगळीच भावनिक खोली मिळणार आहे.
हे पण वाचा.. २ वर्षांनंतर स्मिता शेवाळेचा दमदार कमबॅक; ‘घरोघरी मातीच्या चुली’त वकीलाच्या भूमिकेत एन्ट्री
lagnanantar hoilch prem choti savi entry
‘”Lagnanantar Hoilch Prem”’मध्ये छोट्या सावीच्या आगमनामुळे नंदिनीच्या आयुष्यात आशेचा किरण पुन्हा उजळताना दिसतो आहे. पुढील भागांमध्ये ही गोष्ट कोणत्या दिशेने वळण घेणार, याकडे प्रेक्षकांचे लक्ष लागून राहिले आहे.
हे पण वाचा.. ८५ दिवसांनंतर घरी परतलेल्या सागर कारंडेला कुटुंबीयांचं खास सरप्राइज
