भारतीय दूरदर्शनवरील सर्वात लोकप्रिय मालिकांपैकी एक असलेल्या बी.आर. चोप्रा यांच्या ‘महाभारत’ मालिकेत कर्णाची ताकदीची भूमिका साकारणारे ज्येष्ठ अभिनेते पंकज धीर (Pankaj Dheer Death) आता काळाच्या पडद्याआड गेले आहेत. त्यांच्या निधनाची बातमी समोर आल्यानंतर संपूर्ण मनोरंजन विश्वात शोककळा पसरली आहे. वयाच्या ६८व्या वर्षी त्यांनी कर्करोगाशी झुंज देत अखेर आज, १५ ऑक्टोबर रोजी मुंबईत अखेरचा श्वास घेतला.
पंकज धीर काही वर्षांपूर्वी कर्करोगातून बरे झाले होते. मात्र, काही महिन्यांपूर्वी पुन्हा या आजाराने त्यांना ग्रासले. वैद्यकीय उपचार आणि मोठी शस्त्रक्रिया झाल्यानंतरही त्यांची प्रकृती सतत खालावत गेली. अखेर दीर्घ उपचारानंतर त्यांनी जगाचा निरोप घेतला. त्यांच्या निधनाची माहिती त्यांचे जिवलग मित्र आणि सहकारी अमित बहल यांनी दिली असून, या बातमीची पुष्टी करताना त्यांनी “पंकज आता आपल्यात नाहीत” असं सांगितलं.
आजच मुंबईतील विलेपार्ले येथील पवन हंस स्मशानभूमी येथे त्यांच्या पार्थिवावर अंत्यसंस्कार करण्यात येणार आहेत. या वेळी त्यांच्या कुटुंबियांसह चित्रपटसृष्टीतील सहकलाकार आणि मित्रमंडळी शेवटचा निरोप देण्यासाठी उपस्थित राहणार आहेत.
पंकज धीर हे आपल्या दमदार आवाजासाठी आणि प्रभावी अभिनयशैलीसाठी ओळखले जायचे. त्यांनी ‘सडक’, ‘सोल्जर’, ‘बादशाह’सारख्या अनेक हिंदी चित्रपटांमध्ये महत्त्वाच्या भूमिका साकारल्या. पण त्यांना खरी ओळख मिळाली ती *‘महाभारत’*मधील ‘कर्ण’ या भूमिकेमुळे. या पात्राने त्यांना घराघरात प्रसिद्ध केलं आणि प्रेक्षकांच्या मनात अमिट ठसा उमटवला. Pankaj Dheer Death
पंकज धीर यांचा मुलगा निकितन धीर हा देखील एक प्रसिद्ध अभिनेता आहे. त्याने ‘जोधा अकबर’ आणि ‘चेन्नई एक्सप्रेस’ यांसारख्या चित्रपटांमधून आपल्या अभिनयाची छाप सोडली आहे. वडिलांच्या निधनानंतर तो आणि त्याचं कुटुंब सध्या प्रचंड दुःखात आहेत. अभिनेता पंकज धीर यांच्या निधनाने भारतीय मनोरंजन विश्वातील एक प्रभावी आवाज कायमचा थांबला आहे. ‘कर्ण’ म्हणून ओळख मिळवणाऱ्या या कलाकाराचं योगदान नेहमीच लक्षात राहील. त्यांच्या अभिनयाची जादू प्रेक्षकांच्या मनात कायम जिवंत राहील.