Hardeek Joshi : मराठी मनोरंजनविश्वात ‘तुझ्यात जीव रंगला’ या मालिकेमुळे लोकप्रिय झालेला हार्दिक जोशी पुन्हा एकदा चर्चेत आला आहे. मात्र, यावेळी कारण वेगळं आहे. त्याने दिलेल्या एका भावनिक मुलाखतीत त्याने आपल्या आयुष्यातील कठीण काळाच्या काही आठवणी शेअर केल्या, ज्यात त्याच्या वहिनीचा आणि पत्नी अक्षयाचा उल्लेख करताना त्याच्या डोळ्यांत पाणी आले.
अभिनेता हार्दिक जोशीने ( Hardeek Joshi ) नुकतीच ‘कविरत स्टुडिओ’ला दिलेल्या मुलाखतीत आपल्या करिअरच्या सुरुवातीच्या दिवसांची आठवण करून दिली. तो म्हणाला, “मी जेव्हा या इंडस्ट्रीत पाऊल ठेवलं, तेव्हा माझ्याकडे काहीच नव्हतं. छोटे-मोठे रोल करत होतो, पैसा कमी मिळायचा. त्यावेळी माझ्या वहिनीनं मला खूप मोठा आधार दिला. ती नेहमी म्हणायची — तू तुझं स्वप्न पूर्ण कर, आम्ही तुझ्या पाठीशी आहोत. मी नोकरी करावी की नाही या द्विधा मनःस्थितीत असताना तिनेच मला आत्मविश्वास दिला.” हार्दिक पुढे म्हणाला, “ती माझ्यासाठी आईसारखी होती. माझं स्ट्रगलिंग दिवसांत ती माझं मनोबल वाढवायची. कधी माझ्यासाठी कपडे आणायची, कधी गुपचूप काही पैसे द्यायची. तिच्यामुळेच मी अभिनय क्षेत्रात टिकू शकलो.”
तो पुढे सांगतो, “जेव्हा ‘जाऊबाई गावात’ या कार्यक्रमाचं सूत्रसंचालन करत होतो, तेव्हाच वहिनी गंभीर आजारी असल्याचं समजलं. तिच्या प्रकृतीची स्थिती बिघडल्याचं कळल्यावर मी शो सोडायचं ठरवलं. पण तिनेच मला रोखलं. ऑक्सिजन मास्क लावलेल्या अवस्थेत तिने हाताच्या खुणेने सांगितलं — ‘नको सोडू.’ तिचा तो शेवटचा आशिर्वाद होता. माझा शो यशस्वी झाला, पण ती पाहण्यासाठी नव्हती.” अक्षयाबद्दल बोलताना हार्दिक म्हणतो, “वहिनी आजारी असताना अक्षयाने एकही प्रोजेक्ट स्वीकारला नाही. घराचं संपूर्ण ओझं तिने सांभाळलं. माझ्या कुटुंबाशी ती आजही तितकीच जवळची आहे. तिचा तो त्याग आणि संवेदनशीलता मी कधी विसरू शकत नाही.”
प्राजक्ता माळी आणि ललित प्रभाकर १० वर्षांनंतर एकत्र, चाहत्यांच्या आनंदाला भरारी
हार्दिक जोशीच्या ( Hardeek Joshi ) या भावनिक कबुलीजबाबानं अनेक चाहत्यांच्या डोळ्यांत पाणी आलं. आपल्या कुटुंबाचा आणि जवळच्या लोकांचा पाठिंबा कसा यशाची गुरुकिल्ली ठरतो, याचं हे खरं उदाहरण आहे.
