Ankita Lokhande statement on pregnancy pressure : टीव्हीपासून बॉलिवूडपर्यंत आपली वेगळी ओळख निर्माण करणारी अभिनेत्री अंकिता लोखंडे पुन्हा एकदा चर्चेत आली आहे. गणेश चतुर्थीनिमित्त आयोजित करण्यात आलेल्या कार्यक्रमादरम्यान माध्यमांनी तिला गरोदरपणाविषयी प्रश्न विचारला असता ती स्पष्टपणे संतापली. सतत एकच प्रश्न विचारला जात असल्याने तिने आपली नाराजी व्यक्त केली आणि यामुळे पालक होण्याचं दडपण वाढत असल्याचं स्पष्टपणे सांगितलं.
अंकिता लोखंडे आणि तिचा पती विकी जैन हे सेलिब्रिटी जोडपं नेहमीच चर्चेत असतं. दोघंही वारंवार पार्ट्यांमध्ये, कौटुंबिक समारंभांमध्ये किंवा रिअॅलिटी शोमधून झळकताना दिसतात. यंदा गणेशोत्सवाच्या निमित्ताने ते एका कार्यक्रमात सहभागी झाले होते. त्यावेळी गरोदरपणाविषयी प्रश्न उपस्थित झाल्यावर अंकिताने तात्काळ प्रतिक्रिया देत सांगितलं, “मी खरं सांगते, मला हा प्रश्न आता फारच बोअरिंग वाटतो. कृपया मला असं काही विचारू नका. ज्या दिवशी काही असेल तेव्हा मी स्वतः सांगेन. मला या विषयावर सतत बोलायला आवडत नाही. यामुळे मला पालक होण्याचं अनावश्यक दडपण येतं.”
अभिनेत्रीची ही प्रतिक्रिया सध्या सोशल मीडियावर चर्चेचा विषय ठरत आहे. काही महिन्यांपूर्वी ‘लाफ्टर शेफ’ या कार्यक्रमादरम्यान अंकिताने मजेत स्वतःला गरोदर असल्याचं म्हटलं होतं. कृष्णा अभिषेकसोबतच्या एका स्किटमध्ये ती म्हणाली होती, “मला खूप पळवू नकोस, मी गरोदर आहे”. या एका वाक्यामुळे चाहत्यांमध्ये आणि माध्यमांमध्ये तिच्या गरोदरपणासंबंधी चर्चा रंगल्या होत्या. मात्र नंतर विकी जैनने स्वतः मुलाखतीत स्पष्ट केलं होतं की या अफवांमध्ये कोणताही तथ्य नाही.
डिसेंबर २०२१ मध्ये विवाहबंधनात अडकलेलं हे जोडपं नेहमीच पब्लिक फोरमवर चर्चेत असतं. अंकिता लोखंडेला लोकप्रियता मिळाली ती ‘पवित्र रिश्ता’ या मालिकेमुळे. त्यानंतर तिने काही हिंदी चित्रपटांमध्येही अभिनय केला. अलीकडेच ती आणि विकी ‘बिग बॉस १७’ मध्ये झळकले होते. या शोमुळे त्यांचं वैयक्तिक जीवन प्रेक्षकांसमोर आलं होतं. त्यानंतर ते ‘लाफ्टर शेफ’ या कार्यक्रमातही एकत्र दिसले होते.
मात्र, गरोदरपणाबद्दल वारंवार विचारले जाणारे प्रश्न अभिनेत्रीला त्रासदायक ठरत असल्याचं तिनं या कार्यक्रमादरम्यान स्पष्टपणे सांगितलं. “मला या प्रश्नाचा खरंच कंटाळा आलाय” असं म्हणत तिनं माध्यमांना पुन्हा एकदा स्पष्ट संदेश दिला आहे. तिची ही प्रतिक्रिया पाहून अनेक चाहत्यांनीही सोशल मीडियावर तिच्या भावना समजून घेत समर्थन व्यक्त केलं आहे.
हे पण वाचा.. “Baaghi 4”: टायगर श्रॉफच्या दमदार अॅक्शनला प्रेक्षकांची दाद, पण कथानकावर मिश्र प्रतिक्रिया
