ti mazi bayko aahe samar swanandi baju veen doghantali hi tutena twist : ‘वीण दोघांतली ही तुटेना’ या लोकप्रिय मालिकेत सध्या प्रेक्षकांना एकामागून एक धक्कादायक घडामोडी पाहायला मिळत आहेत. समर आणि स्वानंदी यांच्या नात्यात दिवसेंदिवस वाढत चाललेला विश्वास, त्यांची एकमेकांप्रती असलेली साथ आणि संकटांशी मिळून दिलेला सामना यामुळे ही जोडी प्रेक्षकांच्या पसंतीस उतरली आहे. मात्र त्यांच्या आयुष्यातील अडचणी अजूनही संपलेल्या नसल्याचं नव्या भागांमधून स्पष्ट होत आहे.
समर हा कुटुंबावर जीवापाड प्रेम करणारा आणि प्रत्येकाची काळजी घेणारा व्यक्ती म्हणून दाखवण्यात आला आहे. मात्र त्याच्या घरातच काही जण त्याच्याविरोधात कट रचताना दिसतात. मल्लिका, तिचा मुलगा अंशुमन आणि मुलगी अर्पिता हे सतत समरच्या अडचणी वाढवण्याचा प्रयत्न करत असल्याचं मालिकेत वारंवार पाहायला मिळालं आहे. समरचं नुकसान व्हावं, त्याचं कुटुंब त्याच्यापासून दुरावावं आणि त्याची संपत्ती त्यांच्या ताब्यात यावी, यासाठी ते विविध डाव आखताना दिसतात.
याआधी अंशुमन आणि चिंगीच्या प्रकरणाने मालिकेत मोठी खळबळ उडवली होती. चिंगी गर्भवती असल्याचं समोर आल्यानंतर त्या बाळाचा पिता अंशुमन असल्याची बाब उघड झाली. स्वानंदीला याची माहिती मिळाल्यानंतर तिने सत्य लपवून न ठेवता सर्वांसमोर आणलं. परिणामी अंशुमनचं ठरलेलं लग्न मोडलं आणि घरात मोठा वाद निर्माण झाला.
मात्र आता कथानकाने आणखी अनपेक्षित वळण घेतलं आहे. नुकत्याच समोर आलेल्या भागात स्वानंदीची बहीण सुश्मिताच्या गळ्यातील मंगळसूत्र पाहून समरला आश्चर्याचा धक्का बसतो. तिचं लग्न झाल्याचं कळताच तो आनंदाने तिचं अभिनंदन करतो आणि नवऱ्याबद्दल विचारणा करतो. पण पुढच्याच क्षणी सुश्मिताचा नवरा दुसरा कोणी नसून अंशुमन असल्याचं समोर येतं आणि सर्वांनाच धक्का बसतो.
या घटनेनंतर चिंगीच्या भविष्याबाबत प्रश्न उपस्थित होतात. समरही त्याच मुद्द्यावर बोलतो. मात्र अर्पिता यावर आक्षेप घेत चिंगीचा विषय पुन्हा काढण्यावर नाराजी व्यक्त करते. त्यावेळी स्वानंदी अर्पिताला तिच्या बोलण्याची जाणीव ठेवण्याचा सल्ला देते. यानंतर दोघींमध्ये शाब्दिक वाद रंगतो.
हे पण वाचा.. कृष्णाईच्या लेकी’मध्ये साईदत्त बालीची एन्ट्री; ‘जीत’च्या भूमिकेतून प्रेक्षकांच्या भेटीला येणार नवा चेहरा
ti mazi bayko aahe samar swanandi baju veen doghantali hi tutena twist
स्वानंदीचा अपमान होत असल्याचं पाहून समरचा संताप अनावर होतो. तो सर्वांसमोर ठामपणे उभा राहत स्वानंदीची बाजू घेतो. “ती माझी बायको आहे” असे स्पष्ट शब्दांत सांगत तो तिच्यावर असलेल्या विश्वासाची जाहीर कबुली देतो. एवढंच नाही तर पत्नी म्हणून आणि जीवनसाथी म्हणून तिच्या प्रत्येक निर्णयाला आपला पाठिंबा असल्याचंही तो सांगतो.
यानंतर समर अर्पितालाही चांगलंच सुनावतो. इतरांच्या आयुष्यात हस्तक्षेप करण्यापेक्षा स्वतःच्या संसाराकडे लक्ष देण्याचा सल्ला देत तो तिला घर सोडण्यास सांगतो. या प्रसंगामुळे घरातील वातावरण आणखी तापल्याचं दिसून येत आहे.
हे पण वाचा.. ओवीच्या हाकेसाठी सावली पुन्हा मेहेंदळे वाड्यात? ‘सावळ्याची जणू सावली’ मालिकेत भावनिक वळण
दरम्यान, अंशुमन आणि सुश्मिताच्या लग्नामागचं नेमकं सत्य काय आहे, चिंगीला न्याय मिळणार का, मल्लिका पुढे कोणता नवा डाव खेळणार आणि समर-स्वानंदी या नव्या संकटाचा सामना कसा करणार, याची उत्सुकता आता प्रेक्षकांमध्ये शिगेला पोहोचली आहे. आगामी भागांमध्ये अनेक मोठे खुलासे होण्याची शक्यता असल्याने ‘वीण दोघांतली ही तुटेना’ मालिकेकडे सर्वांचे लक्ष लागून राहिले आहे.
