tharala tar mag priyacha dav ughad sayali sanshay : लोकप्रिय मालिका Tharala Tar Mag मध्ये 25 मार्च 2026 च्या भागात नाट्यमय घडामोडींनी प्रेक्षकांचे लक्ष वेधून घेतले. या भागात प्रियाचे खरे चेहरे समोर येऊ लागतात, तर सायलीच्या मनात तिच्याबद्दल संशय अधिकच गडद होतो.
एपिसोडची सुरुवात अर्जुनच्या मनातील द्वंद्वाने होते. सायलीला साक्षी जिवंत असल्याचं सत्य कळल्यास ती त्याला सोडून जाईल, या भीतीने तो अस्वस्थ होतो. सायली मात्र अर्जुनच्या वागण्यामागचं कारण अस्मिताची चिंता आहे असं समजून त्याला समजावत असते. पण अर्जुनला सत्य सांगण्याचं धाडस होत नाही.
दरम्यान, घरात प्रिया तिचे नवे डाव आखताना दिसते. अर्जुनला घरात थांबवण्यासाठी ती मुद्दाम भीतीचं वातावरण निर्माण करते, पण तिचा हा प्रयत्न फसतो. अर्जुन तिच्या बोलण्याकडे दुर्लक्ष करून कामावर निघून जातो. याचवेळी प्रिया घरकाम टाळण्यासाठी बाळाची जबाबदारी घेते, पण बाळाला सांभाळणं इतकं सोपं नसतं हे तिला लगेच लक्षात येतं. बाळ सतत रडू लागल्याने आणि तिच्या अंगावरच शी केल्याने तिची चांगलीच तारांबळ उडते. या प्रसंगामुळे प्रिया स्वतःच्या आयुष्याबाबतही विचार करताना दिसते.
यानंतर कथेत महत्त्वाचा ट्विस्ट येतो, जेव्हा एक मुलगी प्रियाला तिच्या फॅशन डिझाइनिंग कोर्सबद्दल विचारण्यासाठी घरी येते. प्रिया त्या कोर्सबद्दल काहीच माहिती देऊ शकत नाही, कारण ती प्रत्यक्षात त्या कॉलेजला कधीच गेलेली नसते. या घटनेवर सायली बारकाईने लक्ष ठेवते आणि तिच्या मनात प्रियाबद्दल संशय निर्माण होतो. सायली लगेच तिच्या शिक्षणाची खातरजमा करण्याचा निर्णय घेते. ती कॉलेजच्या यादीत प्रियाचं नाव शोधते, पण तिथे तिचा काहीही मागमूस लागत नाही. त्यामुळे प्रियाच्या बनावट सर्टिफिकेटचा पर्दाफाश होण्याची शक्यता वाढते.
दुसरीकडे, अर्जुन वंदना देशमुख यांच्या जुन्या ऑफिसमध्ये जाऊन माहिती मिळवण्याचा प्रयत्न करतो, पण त्याला काहीच ठोस मिळत नाही. त्याच्या मनातील तणाव वाढत जातो आणि तो छोट्या-छोट्या गोष्टींवरही चिडचिड करताना दिसतो.
हे पण वाचा.. साऊथमध्ये झळकण्याचं स्वप्न! सूरज चव्हाणला अल्लू अर्जुन सोबत कामाची इच्छा
या सगळ्या गोंधळात प्रियाचा आणखी एक प्लॅन फसतो. ती सचिनला साक्षीशी बोलायला मदत करून त्याच्याकडून पैसे उकळण्याचा प्रयत्न करते. पण सचिन तिचा हा डाव ओळखतो आणि तिला स्पष्ट नकार देतो. त्यामुळे प्रियाचा स्वार्थी हेतू पुन्हा एकदा उघड होतो.
शेवटी, सायली सचिनला थेट प्रश्न विचारते—त्याची आणि साक्षीची भेट नेमकी कशी झाली? या प्रश्नामुळे सचिन गोंधळून जातो आणि पुढील भागात मोठं रहस्य उलगडण्याची शक्यता निर्माण होते.
हे पण वाचा.. सई कल्याणकर आई झाली! ‘कमळी’ फेम अभिनेत्रीच्या घरी गोजिरी परीचं आगमन
Tharala Tar Mag मालिकेतील या भागात एकीकडे प्रियाचे खोटं उघड होण्याची प्रक्रिया सुरू आहे, तर दुसरीकडे अर्जुन आणि सायलीच्या नात्यात तणाव वाढताना दिसतो. पुढील भागात या सगळ्या गोष्टींचा कसा स्फोट होणार, याकडे प्रेक्षकांचे लक्ष लागले आहे.
