tharala tar mag nagraj accident suman revelation promo : स्टार प्रवाहवरील गाजलेली मालिका Tharala Tar Mag सध्या प्रेक्षकांना जबरदस्त थरार देत आहे. कथानक जसजसं पुढे सरकत आहे, तसतसे जुने गूढ उलगडू लागले असून आता मालिकेत आतापर्यंतचा सर्वात मोठा खुलासा होणार आहे. २२ वर्षांपूर्वी घडलेल्या भीषण अपघातामागे नेमकं कोण होतं, याबाबत प्रेक्षकांच्या मनात अनेक प्रश्न होते. आता या प्रश्नांची उत्तरं देणारा प्रोमो समोर आला असून, त्याने सर्वांनाच चकित केलं आहे.
अलीकडील भागात रविराज किल्लेदार नागराजला जाब विचारताना दिसतो. “तू दोन दिवस घराबाहेर का होतास?” असा थेट प्रश्न करत तो महिपत शिखरेपासून दूर राहण्याची ताकीदही देतो. याच संवादात रविराज २२ वर्षांपूर्वीच्या अपघातामागे महिपतचा हात असल्याचा संशय व्यक्त करतो. मात्र, सत्य काहीसं वेगळंच असल्याचं आता समोर येत आहे. प्रत्यक्षात या अपघाताचा मुख्य सूत्रधार नागराजच असल्याचं उघड होत आहे. आपल्या भावाला आणि प्रतिमाला संपवण्यासाठी नागराजनेच महिपतला सुपारी दिली होती, हा धक्कादायक खुलासा आता कथानकात वळण आणणार आहे.
रविराजने समज देऊनही नागराजच्या वागण्यात बदल होत नाही. तो पुन्हा रात्री उशिरा घराबाहेर जातो, ज्यामुळे प्रतिमाचा संयम सुटतो. पुढील भागात ती स्पष्ट शब्दांत नागराजला इशारा देणार असल्याचं दिसत आहे. दुसरीकडे, सुमनलाही नवऱ्याच्या हालचाली संशयास्पद वाटू लागतात. या सगळ्या घडामोडींमुळे तिच्या मनात भीतीचं सावट पसरतं.
याच दरम्यान Tharala Tar Mag च्या आगामी भागात सुमन थेट सायली आणि अर्जुनकडे धाव घेते. घाबरलेल्या अवस्थेत ती अर्जुनच्या ऑफिसमध्ये येते आणि २२ वर्षांपूर्वीच्या अपघाताबाबतचं सत्य सांगते. “त्या अपघाताला माझा नवरा सुद्धा जबाबदार आहे,” असं सांगताच सायली-अर्जुनच्या पायाखालची जमीन सरकते. सुमन पुढे काहीतरी सांगणार असते, तेवढ्यात दारावर टकटक होते आणि तिची भीती अधिकच वाढते. नागराजला सत्य कळल्यास आपला जीव धोक्यात येईल, या भीतीने ती पूर्णपणे गोंधळून जाते.
हे पण वाचा.. ‘मुरांबा’ मालिकेत अक्षयचा जबरदस्त बदललेला लूक; रमा पुन्हा जवळ येणार का? प्रोमोमुळे चर्चा
नागराज आणि महिपत यांच्यातील संबंध उघड झाल्यामुळे सुमनचा जीव धोक्यात आला आहे. आता सायली-अर्जुन तिचं संरक्षण कसं करणार, आणि रविराजला आपल्या सख्ख्या भावाचं सत्य समजल्यावर तो काय निर्णय घेणार, हे पाहणं अत्यंत रोचक ठरणार आहे. Tharala Tar Mag मधील हा विशेष भाग २१ डिसेंबर रोजी रात्री ८:३० वाजता प्रसारित होणार असून, या भागामुळे मालिकेचा थरार शिखरावर पोहोचणार यात शंका नाही.
हे पण वाचा.. दिग्गज अभिनेत्रींचा निरोप, आता अर्णवच्या आजीच्या भूमिकेत नवी एन्ट्री; तू ही रे माझा मितवा मालिकेत मोठा बदल
