Swapnil Rajshekhar emotional post for his father : मराठी रंगभूमी, चित्रपट आणि मालिकांमध्ये आपल्या सहजसुंदर अभिनयाने ओळख निर्माण करणारे अभिनेता Swapnil Rajshekhar सध्या एका भावनिक पोस्टमुळे चर्चेत आले आहेत. वडील आणि ज्येष्ठ अभिनेते राजशेखर यांच्या निधनाला २० वर्षे पूर्ण झाल्याच्या पार्श्वभूमीवर स्वप्नील यांनी सोशल मीडियावर आपल्या मनातील भावना मोकळ्या शब्दांत मांडल्या आहेत. २५ डिसेंबर २००५ या दिवसाची आठवण सांगताना त्यांनी लिहिलेली ही पोस्ट वाचून अनेकांचे डोळे पाणावले.
दिवंगत अभिनेते राजशेखर यांनी मराठीसोबतच हिंदी चित्रपटसृष्टीतही विविध भूमिका साकारत आपला ठसा उमटवला होता. अभिनयाबरोबरच सामाजिक जाणीव आणि संवेदनशील व्यक्तिमत्त्वासाठीही ते ओळखले जात होते. आज त्यांच्या अभिनयाचा वारसा Swapnil Rajshekhar पुढे नेत असून लवकरच ते ‘मी सावित्रीबाई जोतीराव फुले’ या मालिकेत महत्त्वाच्या भूमिकेत झळकणार आहेत.
स्वप्नील यांनी शेअर केलेल्या पोस्टमध्ये त्यांनी वडिलांसोबतची शेवटची भेट अत्यंत हळुवार शब्दांत उलगडली आहे. शूटिंगच्या नियोजनाबाबत झालेली चर्चा, वडिलांच्या डोळ्यात पुन्हा चमक निर्माण होणारा क्षण, रेडिओवर लागलेलं आवडतं गाणं आणि त्या शांत, गूढ संध्याकाळचं वातावरण – या सगळ्या आठवणी त्यांनी जिवंत केल्या आहेत. त्या रात्री मनात दडपण, अस्वस्थता असतानाही येऊ घातलेल्या अनिष्टाची चाहूल मन स्वीकारायला तयार नव्हतं, असं त्यांनी सूचक शब्दांत सांगितलं.
पुढील सकाळी आलेल्या एका फोनकॉलने सगळं आयुष्यच बदलून गेलं, असं सांगताना Swapnil Rajshekhar यांनी “त्या क्षणापासून मी कधीच पूर्वीसारखा राहिलो नाही” ही भावना व्यक्त केली आहे. वीस वर्षांनंतरही ही जखम ताजी असल्याचं त्यांच्या शब्दांतून स्पष्ट जाणवतं.
या भावुक पोस्टनंतर अनेक चाहत्यांनी, कलाकार मित्रांनी आणि नेटकऱ्यांनी कमेंट्स करत राजशेखर यांना आदरांजली वाहिली आहे. अनेकांनी स्वप्नील यांच्या शब्दांमधील प्रामाणिक भावना आणि वडिलांवरील प्रेमाचं कौतुक केलं. Swapnil Rajshekhar यांची ही पोस्ट केवळ वैयक्तिक आठवण नसून, वडील–मुलाच्या नात्यातील हळवे भाव अधोरेखित करणारी ठरली आहे. त्यामुळेच ही भावना आजही अनेकांच्या मनाला भिडत आहे.
हे पण वाचा.. सावळ्याची जणू सावली मालिकेत सावलीच्या आवाजाचं सत्य समोर येताच सारंग भावूक
