Shivani Sonar experience : झी मराठीवरील लोकप्रिय मालिका तारिणी मधून प्रेक्षकांच्या भेटीला येणारी अभिनेत्री Shivani Sonar सध्या चर्चेत आहे, मात्र यावेळी तिच्या भूमिकेमुळे नाही तर तिच्या एका प्रामाणिक कबुलीजबाबामुळे. झी मराठीने नुकताच एक व्हिडीओ शेअर केला असून, त्यामध्ये शिवानीने तिच्या आयुष्यातील एक खास अनुभव मोकळेपणाने सांगितला आहे. या व्हिडीओमध्ये तिला एक चिठ्ठी दिली जाते, ज्यामध्ये “तू कोणती गोष्ट लाईटली घेतली पाहिजे?” असा प्रश्न लिहिलेला असतो.
यावर उत्तर देताना Shivani Sonar म्हणते की ती लहानपणापासूनच खूप हातवारे करून बोलते आणि मनमोकळेपणाने, मोठ्याने हसते. हातवारे करून बोलणं हे तिच्या अभिनयाच्या क्षेत्रात उपयोगी ठरतं, मात्र मोठ्याने हसण्यामुळे तिला अनेकदा टीकेला सामोरं जावं लागलं. अनेकांनी तिला “जरा हळू हसत जा” असा सल्लाही दिला असल्याचं ती सांगते.
शिवानीने तिच्या लग्नाचा अनुभव सांगताना विशेष गोष्ट शेअर केली. तिच्या लग्नाच्या व्हिडीओखाली “किती मोठ्याने हसते”, “जोरात हसते” अशा अनेक कमेंट्स आल्याचं तिने मान्य केलं. सुरुवातीला या शब्दांचा तिला खूप परिणाम होत होता. मात्र, कालांतराने तिने स्वतःला स्वीकारलं आणि आता या गोष्टींचा तिला फरक पडत नाही, असं ती स्पष्टपणे सांगते. “मी अशीच आहे आणि तशीच राहणार,” हा तिचा आत्मविश्वास चाहत्यांना भावला आहे.
या व्हिडीओवर सोशल मीडियावर भरभरून प्रतिक्रिया उमटल्या आहेत. अभिनेत्री भक्ती रत्नपारखीने “प्लीज अशीच हसत राहा, तुझी स्माईल खूप छान आहे,” अशी कमेंट केली. अनेक नेटकऱ्यांनी स्वतःचे अनुभव शेअर करत शिवानीला पाठिंबा दिला. “तू जशी आहेस तशीच राहा”, “तुझं हसणं खूप सकारात्मक आहे” अशा प्रतिक्रिया मोठ्या प्रमाणात पाहायला मिळाल्या.
दरम्यान, तारिणी मालिकेच्या कथानकाबद्दल बोलायचं झालं तर, या मालिकेत एक विशेष क्राईम ब्रँच युनिट दाखवण्यात आलं आहे. या युनिटची प्रमुख तारिणी असून, केदार तिच्या टीमचा भाग आहे. दोघंही आपली खरी ओळख लपवून गुन्हेगारांना पकडण्याचं काम करत आहेत. युवराजला पकडण्यासाठी त्यांनी नवरा-बायको असल्याचं नाटक केलं असून, खांडेकरांच्या घरी जाऊन राहण्याचा धाडसी निर्णय घेतला आहे.
हे पण वाचा.. ज्वारीची भाकरी ते सायकलिंगपर्यंत – दीपाली पानसरेचा साधा आणि प्रभावी वेट लॉस फॉर्म्युला
युवराज आणि निशिता सतत कट-कारस्थानं रचत असले तरी तारिणी आणि केदार योग्य वेळी योग्य उत्तर देताना दिसतात. पुढील भागांमध्ये काय नवे वळण येणार, हे पाहणं प्रेक्षकांसाठी नक्कीच उत्सुकतेचं ठरणार आहे. Shivani Sonar हिचा हा प्रामाणिक अनुभव आणि मालिकेतील दमदार भूमिका, दोन्ही कारणांनी ती सध्या चर्चेत आहे.
हे पण वाचा.. लक्ष्मीच्या पाऊलांनी’ फेम अभिनेता ऋत्विक तळवलकर अडकला लग्नबंधनात; शाही सोहळ्यात अनुष्कासोबत घेतले सात फेरे
