Savalyachi Janu Savali Savali voice truth exposed : ‘सावळ्याची जणू सावली’ म्हणजेच ‘सावळ्याची जणू सावली’ ही मालिका गेल्या दीड वर्षांपासून प्रेक्षकांच्या मनावर अधिराज्य गाजवत आहे. साधी, भावनिक आणि वास्तवाला भिडणारी कथा, त्यातले प्रभावी कलाकार आणि संगीताची खास पार्श्वभूमी यामुळे ही मालिका अल्पावधीतच घराघरात पोहोचली. नुकत्याच पार पडलेल्या झी मराठी पुरस्कार सोहळ्यातही या मालिकेचा दबदबा स्पष्टपणे दिसून आला. आता मात्र या मालिकेत असा मोठा खुलासा होणार आहे, ज्यामुळे संपूर्ण कथानकाला नवा वळण मिळणार आहे.
कथेच्या केंद्रस्थानी असलेली सावली गेली अनेक वर्षे ताराचा आवाज म्हणून पडद्यामागे वावरत आहे. रंगमंचावर झळकणारी तारा गात असल्याचं सगळ्यांना वाटत असतं, पण प्रत्यक्षात त्या गाण्यामागे सावलीचा सुमधूर आवाज असतो. लहानपणापासून गाण्याची उपजत देणगी लाभलेली सावली भजनं, गाणी अत्यंत सुरेलपणे सादर करत आली आहे. याच गुणवत्तेचा गैरफायदा भैरवीने घेतला आणि सावलीकडून आवाजाचा करार करून घेतला. त्या करारामुळे सावलीला स्वतःची ओळख बाजूला ठेवून, तारासाठी गाणं गाणं भाग पडलं.
हा खोटेपणाचा खेळ अनेक वर्षे अव्याहतपणे सुरू होता. मात्र, काही दिवसांपूर्वी सारंगसमोर सावलीच्या आवाजाचं सत्य उघड झालं आणि तेव्हापासून तो आपल्या पत्नीला योग्य ओळख मिळवून देण्यासाठी धडपड करत आहे. अखेर येत्या विशेष भागात सारंग मोठं पाऊल उचलताना दिसणार आहे. रंगमंचावर भर कार्यक्रमात तारा परफॉर्म करत असताना, अचानक बॅकग्राऊंड उघडतो आणि सर्व प्रेक्षकांना धक्कादायक सत्य दिसतं—ताराच्या मागे उभी राहून सावली गात असते.
हा क्षण पाहून उपस्थित सगळेच स्तब्ध होतात. वर्षानुवर्षे दडलेलं सत्य एकाच क्षणात समोर येतं. अश्रूंनी डोळे भरलेली सावली कराराची खूण असलेला धागा काढून भैरवीकडे चेक सुपूर्द करते आणि या अन्यायकारक करारातून मुक्त करण्याची मागणी करते. भैरवीचा संताप अनावर होतो, पण सारंग आणि कुटुंबीयांसमोर तिला गप्प राहावं लागतं.
या भावनिक प्रोमोने Savalyachi Janu Savali च्या चाहत्यांना अक्षरशः भारावून टाकलं आहे. “या क्षणाची फार दिवस वाट पाहत होतो”, “सारंगसारखा जोडीदार प्रत्येकाला मिळावा”, “सावलीला अखेर न्याय मिळतोय” अशा असंख्य प्रतिक्रिया सोशल मीडियावर उमटत आहेत.
हे पण वाचा.. भावाच्या लग्नात रितिका श्रोत्रीची धमाल, संगीत सोहळ्यात ‘डोला रे डोला’वर झक्कास डान्स
५ जानेवारी रोजी सायंकाळी ६:३० वाजता प्रसारित होणारा हा विशेष भाग मालिकेसाठी मैलाचा दगड ठरणार आहे. सावलीला अखेर तिच्या कर्तृत्वाची खरी ओळख मिळणार असून, Savalyachi Janu Savali मध्ये सत्य, आत्मसन्मान आणि न्यायाचा नवा अध्याय सुरू होणार आहे.
हे पण वाचा.. हेमलता बाणे पाटकर खंडणी प्रकरणानंतर अर्चना पाटकरांच्या पाठीशी उभी राहिली अश्विनी महांगडे भावनिक पोस्ट व्हायरल
