prajakta gaikwad new post after wedding video : मराठी टेलिव्हिजन इंडस्ट्रीतील लोकप्रिय अभिनेत्री प्राजक्ता गायकवाड नुकतीच विवाहबंधनात अडकली असून २ डिसेंबर रोजी पार पडलेल्या तिच्या लग्नसोहळ्यानंतरची पहिली सोशल मीडिया पोस्ट सध्या चांगलीच चर्चेत आहे. शंभुराज खुटवड यांच्यासोबत थाटामाटात झालेल्या विवाहानंतर प्राजक्ताने शेअर केलेल्या खास व्हिडिओने चाहत्यांचे लक्ष वेधले असून नव्या नवरीचा मराठमोळा साज पुन्हा एकदा चर्चेचा विषय ठरला आहे.
गेल्या अनेक दिवसांपासून हळद, मेहंदी, संगीत आणि घाणा भरण्याच्या सोहळ्यांच्या झलकांमुळे प्राजक्ताचे लग्न सोशल मीडियावर अगदी ट्रेंडिंग होते. अशातच लग्नानंतर ती आणि शंभुराज सर्वप्रथम जेजुरी गडावर खंडेरायाच्या दर्शनासाठी रवाना होत असल्याचा व्हिडिओ अभिनेत्रीने इंस्टाग्रामवर शेअर केला. “आम्ही दोघंही जेजुरीला जायला निघालो आहोत,” असे कॅप्शन देत तिने चाहत्यांना पहिल्या प्रवासाची झलक दाखवली.
या व्हिडिओत प्राजक्ता गायकवाडचा पारंपरिक लूक विशेष उठून दिसतो. पिवळ्या रंगाची आकर्षक साडी, हातभर हिरव्या बांगड्यांचा चुडा, गळ्यात नाजूक दागिने, नाकात नथ अशा मराठमोळ्या साजात ती दिसत असून तिच्या गळ्यातील ठसठशीत मंगळसूत्राने मात्र सगळ्यांचे लक्ष वेधून घेतले आहे. अनोख्या डिझाइनमुळे ते मंगळसूत्र सध्या चर्चेचा विषय ठरत असून अनेक चाहत्यांनी त्यावर कौतुकाचा वर्षाव केल्याचे दिसते.
“नवरीबाई खरंच एक नंबर दिसताय”, “हेच खरं सौंदर्य”, “आमच्या राणी सरकार” अशा कमेंट्स चाहत्यांनी व्हिडिओवर करत प्राजक्तासाठी प्रेम व्यक्त केले. लग्नाला अनेक कलाविश्वातील कलाकारांसह राजकीय मान्यवरांचीही उपस्थिती पाहायला मिळाली होती.
प्राजक्ता गायकवाड आणि शंभुराज यांची भेटही अगदी चित्रपटात शोभावी अशी. अभिनेत्रीच्या गाडीला ट्रकची झालेली धडक हा त्यांच्या नात्याचा पहिला धागा ठरला. त्या ट्रकचे मालक शंभुराज असल्यामुळे ते स्वतः प्राजक्ताला सेटवर सोडायला गेले आणि तिथून दोघांची ओळख, गप्पा आणि पुढे वाढलेलं नातं थेट विवाहापर्यंत पोहोचलं.
हे पण वाचा.. प्राजक्ता गायकवाडचा भावुक डान्स व्हायरल; आई-बाबांच्या डोळ्यात आले पाणी!
नव्या आयुष्याच्या प्रवासाची सुरुवात देवी-देवतांच्या दर्शनाने करण्याचा निर्णय घेत, प्राजक्ताने शेअर केलेला हा व्हिडिओ आता तिच्या चाहत्यांसाठी खास ठरत आहे. तिच्या पोस्टने पुन्हा एकदा सिद्ध केले की Prajakta Gaikwad ही केवळ उत्कृष्ट अभिनेत्रीच नाही, तर परंपरेचा मान राखणारी मराठमोळी नवरीदेखील आहे.
