nitish chavan new bhakti song appearance : मराठी टेलिव्हिजन विश्वात भावनिक आणि कुटुंबकेंद्री कथांमधून प्रेक्षकांच्या मनात घर करणाऱ्या ‘लाखात एक आमचा दादा’ मालिकेने काही दिवसांपूर्वी प्रेक्षकांचा निरोप घेतला. या मालिकेतील सूर्या दादाची भूमिका साकारणारा Nitish Chavan अल्पावधीतच घराघरात पोहोचला. चार बहिणींसाठी ढाल बनून उभा राहणारा सूर्या दादा, त्याचा संघर्ष, त्याग आणि प्रेमळ स्वभाव यामुळे ही व्यक्तिरेखा विशेष गाजली.
कथानकानुसार, लहानपणीच आईचं छत्र हरपलेलं, वडिलांच्या व्यसनाधीनतेमुळे घराची संपूर्ण जबाबदारी अचानक खांद्यावर आलेला सूर्या – या सगळ्या परिस्थितीतही तो बहिणींचा आधारस्तंभ बनतो. या प्रवासात सूर्या आणि तुळजाची जोडीही प्रेक्षकांच्या विशेष पसंतीस उतरली. जवळपास वर्षभर चाललेल्या या मालिकेने भावनिक नात्यांची गोष्ट मांडत प्रेक्षकांना खिळवून ठेवलं. त्यामुळे मालिका संपल्यानंतर नितीश चव्हाण पुढे कोणत्या भूमिकेत दिसणार, याकडे चाहत्यांचं लक्ष लागणं साहजिक होतं.
आता या उत्सुकतेला थोडासा विराम मिळाला आहे. ‘लाखात एक आमचा दादा’नंतर Nitish Chavan एका नव्या गाण्याच्या माध्यमातून प्रेक्षकांच्या भेटीला आला आहे. ‘महादेवाच्या पिंडीवर बेल वाहिला’ असं या गाण्याचं नाव असून, महाशिवरात्रीच्या पावन निमित्ताने हे भक्तीमय गीत सादर करण्यात आलं आहे. गाण्यातील वातावरण, शब्दांची भक्तीभावना आणि नितीशचं संयत सादरीकरण प्रेक्षकांच्या लक्षात भरत आहे.
या गाण्याचे बोल चंदन कांबळे यांनी लिहिले असून आवाज दिला आहे रवींद्र खोमणे यांनी. संगीताची जबाबदारीही चंदन कांबळे यांनीच सांभाळली आहे. गाणं प्रदर्शित होताच सोशल मीडियावर प्रतिक्रिया उमटू लागल्या आहेत. ‘हर हर महादेव’च्या जयघोषासह अनेकांनी गाण्याचं आणि नितीशच्या अभिनयाचं कौतुक केलं आहे. काही चाहत्यांनी हे गाणं पाहून मन प्रसन्न झाल्याचंही लिहिलं आहे.
याआधी Nitish Chavan ला झी मराठीवरील ‘लागिरं झालं जी’ या मालिकेमुळेही मोठी लोकप्रियता मिळाली होती. त्या मालिकेतील अजिंक्य ही भूमिका आणि शीतल-अजिंक्यची जोडी प्रचंड गाजली होती. वेगवेगळ्या स्वभावाच्या भूमिका साकारण्याची त्याची क्षमता यामुळेच तो आजही प्रेक्षकांच्या लक्षात आहे.
हे पण वाचा.. माझ्या वडिलांसाठी हा क्षण खास…प्रियदर्शिनी इंदलकरला पुणे विद्यापीठाचा युवागौरव पुरस्कार
आता भक्तीमय गाण्यानंतर पुढील काळात नितीश चव्हाण कोणत्या नव्या प्रोजेक्टमधून प्रेक्षकांसमोर येणार, याकडे चाहत्यांची उत्सुक नजर लागली आहे. सूर्या दादाच्या आठवणी अजूनही ताज्या असतानाच, त्याचा हा नवा अवतार प्रेक्षकांसाठी नक्कीच वेगळा अनुभव ठरत आहे.
