muramba serial rama akshay reunion : स्टार प्रवाहवरील Muramba ही मालिका सुरुवातीपासूनच वेगवेगळ्या वळणांमुळे चर्चेत राहिली आहे. रमा आणि अक्षय या जोडीने प्रेक्षकांच्या मनात खास स्थान निर्माण केलं आहे. स्वभाव, विचार, शिक्षण आणि जीवनशैली या सगळ्यांमध्ये मोठा फरक असतानाही दोघांची नाळ कशी घट्ट जुळते, हे या मालिकेचं प्रमुख वैशिष्ट्य राहिलं आहे. लग्नानंतर सुरू झालेली त्यांची मैत्री पुढे प्रेमात रूपांतरित झाली आणि अनेक संकटांवर मात करत त्यांनी आपलं नातं टिकवून ठेवलं.
कथानकात वेळोवेळी रेवाने, अक्षयच्या वडिलांनी आणि आजीने त्यांच्या नात्यात अडथळे निर्माण करण्याचा प्रयत्न केला. मात्र रमा आणि अक्षय कधीच एकमेकांपासून पूर्णपणे दूर गेले नाहीत. परिस्थिती बदलली ती अक्षयच्या आत्येच्या आगमनानंतर. तिच्या कारस्थानांमुळे रमा तिच्या लहान मुलीला सोडून घरातून निघून गेली आणि अक्षयच्या मनात तिच्याबद्दल गैरसमज निर्माण झाले. सात वर्षांनंतर पुन्हा एकदा रमा आणि अक्षय समोरासमोर आले, तेव्हा त्यांची मुलगी आरोही सात वर्षांची झाली होती.
वेगळ्या वाटा चालत असतानाही एकमेकांबद्दलचं प्रेम, काळजी आणि ओढ कमी झाली नव्हती. रमाने दुसऱ्या लग्नाचा निर्णय घेतल्यानंतर अक्षयला त्याच्या भावनांची खरी जाणीव झाली. त्याने तिला थांबवण्यासाठी अनेक प्रयत्न केले, पण रमा तिच्या निर्णयावर ठाम राहिली. अशा स्थितीत आता Muramba मालिकेच्या नव्या प्रोमोने कथेला पूर्णपणे वेगळं वळण दिलं आहे.
स्टार प्रवाहने शेअर केलेल्या या प्रोमोमध्ये अक्षय आपल्या मुलीसह रमाच्या आयुष्यातून कायमचा निघून जात असल्याचं दिसतं. भावनिक संवाद, नशिबापुढे हार मानल्याची कबुली आणि त्याच क्षणी रमाचा आवाज… हे सगळं दृश्य प्रेक्षकांना भावूक करतं. रमा थेट लग्नाचा मंडप सोडून अक्षयसमोर येते आणि आपल्या प्रेमाची कबुली देते. दोघांचा एकमेकांकडे धाव घेतला जाणारा क्षण आणि ‘आय लव्ह यू’ची देवाणघेवाण हा प्रोमोचा सर्वात भावनिक भाग ठरतो.
हे पण वाचा.. केदारसाठी रणरागिणी बनेल तारिणी! घरात घुसलेल्या गुंडांना देणार चोख उत्तर; पाहा नवा प्रोमो
हा प्रोमो शेअर करताना “अखेर रमा-अक्षय एकत्र येणार…” अशी कॅप्शन देण्यात आली असून, सोशल मीडियावर त्याला मोठा प्रतिसाद मिळतो आहे. आता Muramba मालिकेत पुढे काय घडणार, रमा-अक्षयचं नातं कायमचं मजबूत होणार की पुन्हा काही नवं वादळ येणार, हे पाहणं प्रेक्षकांसाठी नक्कीच उत्सुकतेचं ठरणार आहे.
हे पण वाचा.. लग्नानंतर उमलणारं खरं प्रेम! पार्थने काव्याला दिलं आयुष्यभराचं वचन; प्रोमोने जिंकलं प्रेक्षकांचं मन
