mee sansar majha rekhite new serial sun marathi : मराठी छोट्या पडद्यावर नवनव्या मालिकांची लाट पाहायला मिळत असताना आता आणखी एक आकर्षक मालिका प्रेक्षकांच्या भेटीला येत आहे. ‘मी संसार माझा रेखिते’ या नावाने ओळखली जाणारी ही नवी मालिका डिसेंबर महिन्यापासून प्रेक्षकांसमोर येणार असून तिचा प्रोमो नुकताच प्रदर्शित झाला आहे. सोशल मीडियावर झळकलेल्या या प्रोमोने प्रेक्षकांची उत्सुकता चांगलीच वाढवली आहे.
या मालिकेत प्रेक्षकांची लाडकी अभिनेत्री दीप्ती केतकर मुख्य भूमिकेत दिसणार आहे. तिच्या अभिनयाची आणि सौम्य व्यक्तिमत्त्वाची झलक प्रोमोमध्ये सुंदरपणे दाखवण्यात आली आहे. मालिकेच्या कथानकात एका गृहिणीचा दैनंदिन जीवनातील संघर्ष, जबाबदाऱ्या आणि तिच्या भावनिक प्रवासाचं वास्तव दर्शन घडणार आहे. सकाळपासून रात्रीपर्यंत कुटुंबासाठी धावपळ करणाऱ्या स्त्रीकडे कुणीच लक्ष देत नाही, तिच्या प्रयत्नांचं मोल कोणी ओळखत नाही — अशी भावना या प्रोमोमध्ये प्रभावीपणे सादर केली आहे.
“जोडायचं ठरवलं तर सगळं जोडता येतं” या वाक्याभोवती या मालिकेचं कथानक फिरणार आहे. दिप्तीच्या व्यक्तिरेखेच्या माध्यमातून कुटुंबातील प्रेम, तुटलेली नाती आणि पुन्हा नव्यानं नाती जोडण्याचा प्रवास दाखवला जाणार आहे. तिच्या बरोबरच हरीश दुधाडे, रोहिणी निनावे, प्रणिता आचरेकर, संजीवनी जाधव, आभा बोडस आणि दिप्ती सोनावणे यांसारखी अनुभवी कलाकारांची दमदार फळी या मालिकेत झळकणार आहे.
‘मी संसार माझा रेखिते’ ही मालिका १ डिसेंबरपासून रात्री ९:३० वाजता ‘सन मराठी’ वाहिनीवर प्रसारित होणार आहे. प्रोमो प्रदर्शित झाल्यापासून प्रेक्षक सोशल मीडियावर कौतुकाचा वर्षाव करत आहेत. माधवी निमकर, राज मोरे, अश्विनी मुकादम आणि अंकित मोहन यांसारख्या कलाकारांनी देखील या मालिकेचं आणि टीमचं मनापासून अभिनंदन केलं आहे.
हे पण वाचा.. गोविंदाच्या गाण्यावर माधवी निमकरचा झकास ठुमका; नेटकरी म्हणाले, “हे तर भन्नाटच!”
छोट्या पडद्यावर नेहमीच नव्या कथा, नव्या भावना आणि नवी नाती रंगवत ‘मी संसार माझा रेखिते’ ही मालिका नक्कीच प्रेक्षकांच्या मनाला भिडेल, अशी चर्चा सध्या सुरू आहे.
हे पण वाचा.. लग्नाचा विचार आहे का नाही? ‘आई कुठे काय करते’ फेम गौरी कुलकर्णीचं मजेशीर उत्तर चर्चेत!
