marathi industry nikita datta abhivyakta : मराठी चित्रपटसृष्टीने गेल्या काही वर्षांत प्रेक्षकांच्या मनावर अधिराज्य गाजवले आहे. त्यात कोकणातील गणेशोत्सव आणि कौटुंबिक नातेसंबंधांवर आधारित ‘घरत गणपती’ हा चित्रपट विशेष ठरला. या चित्रपटात भूषण प्रधानसोबत हिंदीतील लोकप्रिय अभिनेत्री निकिता दत्ता मुख्य भूमिकेत दिसली होती. सिनेमात तिने अमराठी मुलगी साकारत प्रेक्षकांची मनं जिंकली. आता नुकत्याच दिलेल्या एका मुलाखतीत निकिताने मराठी इंडस्ट्रीबद्दल आपली मनोगते मांडली आहेत.
नवरात्रीच्या निमित्ताने एका सांस्कृतिक कार्यक्रमात सहभागी झाल्यानंतर निकिता दत्ता ‘कलाकृती मीडिया’शी बोलताना म्हणाली, “मराठी इंडस्ट्रीत काही अशा गोष्टी आहेत ज्या हिंदी चित्रपटसृष्टीत इतक्या ठळकपणे जाणवत नाहीत. पहिली गोष्ट म्हणजे प्रत्येक कलाकाराला दिला जाणारा आदर. मी ‘घरत गणपती’च्या शूटिंगदरम्यान हे जवळून अनुभवले. सेटवर स्पॉटबॉयपासून ते कॉस्च्युम टीमपर्यंत आणि कलाकारांपर्यंत – सगळ्यांमध्ये एक वेगळाच आपलेपणा जाणवतो. परस्परांप्रती असलेला हा आदर आणि सन्मान पाहून मी भारावून गेले.”
तिच्या मते, मराठी माणूस आपल्या संस्कृतीशी अगदी जिव्हाळ्याने जोडलेला आहे. ती पुढे म्हणाली, “शूटदरम्यान आम्ही सण-समारंभाशी संबंधित दृश्ये टिपत होतो. त्या वेळी प्रत्येकाने काळजी घेतली की कोणत्याही धार्मिक किंवा सांस्कृतिक बाबतीत चुकीचं चित्रण होऊ नये. मराठी माणसांच्या भावनांशी खेळ करणं शक्यच नाही, कारण त्यांच्यातील शिस्तप्रियता आणि संस्कृतीबद्दलची निष्ठा अतिशय ठळक आहे. या संवेदनशीलतेमुळेच मराठी परंपरा आज इतक्या ताकदीने टिकून आहे.”
‘घरत गणपती’मुळे मराठी प्रेक्षकांशी तिचा जवळचा संबंध जुळला असल्याचं निकिता दत्ता सांगते. मराठी प्रेक्षकांचा प्रेमळ प्रतिसाद, तसेच इंडस्ट्रीतील आपलेपणा आणि सन्मान तिला आयुष्यभर लक्षात राहतील, असंही ती म्हणाली.
निकिता दत्ता ही हिंदी मालिकांपासून ते सिनेमांपर्यंत सक्रिय असलेली कलाकार आहे. मात्र, मराठी सिनेमातील तिचा अनुभव हा तिच्या कारकिर्दीत खास ठरला आहे. प्रेक्षकांनी दिलेलं प्रेम आणि इंडस्ट्रीने दिलेला आदर ही दोन गोष्टी ती भविष्यातही आपल्या प्रवासात जपून ठेवेल, असं तिने स्पष्ट केलं.
हे पण वाचा.. प्राजक्ता गायकवाड लवकरच लग्नबंधनात; पाहा खास लग्नपत्रिका आणि शुभ मुहूर्त
मराठी चित्रपटसृष्टीत काम करण्याचा अनुभव सांगताना निकिताने व्यक्त केलेल्या भावना आता चर्चेचा विषय ठरत आहेत. तिच्या या मनमोकळ्या प्रतिक्रिया पुन्हा एकदा दाखवून देतात की मराठी इंडस्ट्री केवळ सिनेमापुरती नाही, तर संस्कृती, आपुलकी आणि सन्मान जपणारी एक कुटुंबवत्सल दुनिया आहे.
हे पण वाचा.. उमेश कामत आणि प्रिया बापटच्या वैवाहिक आयुष्यातील १४ वर्षांचा सहप्रवास, अभिनेत्रीने शेअर केला खास व्हिडीओ
