kon hotis tu kaay zaalis tu new twist yug entry : स्टार प्रवाहवरील लोकप्रिय मालिका ‘कोण होतीस तू काय झालीस तू’ सध्या एका अशा टप्प्यावर येऊन पोहोचली आहे, जिथे कथानकाचा रंगच बदलणार आहे. आतापर्यंत शांत आणि भावनिक वातावरणात पुढे जाणारी कथा आता एक अनपेक्षित वळण घेणार आहे. मालिकेत यशच्या अपघाती मृत्यूची बातमी उघड होताच कावेरीचे आयुष्य अक्षरशः कोलमडले. त्याला गमावल्याचं दुःख तिच्या मनात खोलवर चिरत असताना, त्याच वेळी घरच्यांपासून हे सत्य दडवण्याची जबाबदारीही तिच्यावर येऊन पडली आहे. कावेरीच्या मनातील घालमेल वाढत असतानाच मालिकेत एका नवीन पात्राचं आगमन होणार आहे—यशसारखाच दिसणारा युग.
युगच्या आगमनाने मालिकेत नवा ट्विस्ट तयार होतोय. दिसायला यशसारखा असला, तरी त्याचा स्वभाव यशच्या अगदी विरुद्ध. यश जिथे समजूतदार, शांत आणि प्रेमाने वागणारा होता, तिथे युग मनाने पूर्णपणे ‘फिल्मी’ आहे. तो अभिनेता होण्यासाठी झगडणारा, स्वप्नांच्या मागे धावताना वास्तवातलं भान हरवणारा, आणि पैशासाठी काहीही करायला मागे न हटणारा माणूस आहे. प्रेक्षकांसाठी ही दोन्ही पात्रं एकाच मालिकेत पाहणं हा स्वतःमध्येच एक वेगळा अनुभव ठरणार आहे.
या दोन्ही भूमिका अभिनेता मंदार जाधव साकारणार आहे. एका मालिकेत दोन भिन्न स्वभावाची पात्रं एकाच वेळी उभी करण्याचं आव्हान स्वीकारताना तो विशेष उत्सुक दिसत आहे. यशच्या सौम्य स्वभावापेक्षा पूर्ण भिन्न असलेला युग हा त्याच्यासाठीही एक प्रयोग ठरणार आहे. मंदारच्या मते, दोन वेगवेगळ्या व्यक्तिमत्त्वांना एकाच कथेत जिवंत करण्याची संधी ही प्रत्येक कलाकाराला दुर्मीळच मिळते.
‘कोण होतीस तू काय झालीस तू’ मालिकेत पुढे कावेरी आणि युगची भेट कशी होते, त्यांच्या नात्याभोवती पुढील कथा कशी फिरते, याबद्दल प्रेक्षकांमध्ये औत्सुक्याचं वातावरण तयार झालं आहे. यशची प्रतिमा विस्मरणात जात असताना, त्याच्यासारखाच चेहरा अचानक समोर येणं, हे कथेच्या भावनिक प्रवाहात मोठा धक्का देणार आहे. स्टार प्रवाहवर रात्री साडेदहा वाजता प्रसारित होणारी ही मालिका आता एका नवीन दिशेने मार्गक्रमण करणार असून, येणारे भाग प्रेक्षकांना पूर्णपणे खिळवून ठेवणार हे निश्चित.
हे पण वाचा.. कमळी मालिकेत धमाका! हृषी–अनिकाचा साखरपुडा ठरणार? कामिनीचा ब्लॅकमेलचा नवा प्लॅन
