सोशल मीडियाच्या या युगात एखाद्या व्यक्तीची कला, त्याचा आवाज किंवा त्याची कहाणी काही क्षणांत लाखो लोकांपर्यंत पोहोचते. अनेकदा अशा माध्यमातून फक्त प्रसिद्धीच नाही, तर माणुसकीचंही दर्शन घडतं. अलीकडेच अशाच एका प्रसंगाने नेटकऱ्यांच्या मनाला स्पर्श केला, आणि त्यामागे होते मराठी चित्रपटसृष्टीतील लोकप्रिय दिग्दर्शक केदार शिंदे (Kedar Shinde).
आषाढी वारीच्या दिवसांत यवतमाळ जिल्ह्यातील इंगोले आजोबा सोशल मीडियावर व्हायरल झाले होते. वारीवरून परतताना, हातात पेटी (हार्मोनियम) घेऊन विठोबाच्या अभंगात तल्लीन झालेल्या त्यांच्या व्हिडीओने अनेकांचं मन जिंकलं. सुरेल गायकी, साधेपणा आणि भक्तीभावाने भारावलेला तो क्षण अनेकांनी आपल्या सोशल मीडिया हँडलवर शेअर केला. मनोरंजन क्षेत्रातील अनेक कलाकारांनीही हा व्हिडीओ पाहून आजोबांच्या गायकीचं कौतुक केलं.
हा भावपूर्ण व्हिडीओ Kedar Shinde यांच्या नजरेस पडताच, त्यांनी ठरवलं की या आजोबांना एक नवं, दर्जेदार हार्मोनियम भेट द्यायचं. पण, आव्हान होतं ते म्हणजे त्यांचा पत्ता किंवा संपर्क क्रमांक मिळवणं. स्वतः शिंदेंनी सोशल मीडियावरून आणि मित्रमंडळातून चौकशी सुरू केली. अखेर राहुल धांडे यांच्या मदतीने आजोबांच्या नातवाचा नंबर मिळाला आणि यवतमाळच्या त्यांच्या गावी संपर्क साधता आला.
केदार शिंदेंनी स्थानिक झापटे हार्मोनियम दुकानातून एक नवं हार्मोनियम खरेदी केलं. नंतर ते आजोबांच्या हाती सुपूर्द करण्यात आलं. या भावनिक क्षणाचा एक व्हिडीओ केदार शिंदेंनी स्वतःच्या सोशल मीडिया अकाउंटवर शेअर केला. तो शेअर करताना त्यांनी लिहिलं, “स्वामी कृपेने हार्मोनियम इंगोले आजोबांच्या हाती पोहोचलं. त्यांना पाहिल्यानंतर पहिल्याच क्षणी ठरवलं होतं की त्यांना नवं हार्मोनियम द्यायचं. तुमच्या सगळ्यांच्या मदतीमुळे हा संकल्प पूर्ण झाला, मनापासून धन्यवाद.”
हे पण वाचा..पहलगाम हल्ल्यात पतीला गमावलेल्या हिमांशी नरवालला ‘Bigg Boss 19’ची ऑफर; चर्चांना उधाण
या कृतीनंतर केदार शिंदेंच्या सोशल मीडिया पोस्टवर चाहत्यांनी कौतुकाचा वर्षाव केला. “तुमच्या माणुसकीला सलाम”, “एक सच्चा कलाकारच दुसऱ्या कलाकाराचं महत्त्व ओळखू शकतो”, “सर, तुम्ही नेहमीच अशा छोट्या मोठ्या कलाकारांना उर्जा देता”, अशा प्रतिक्रिया पाहायला मिळाल्या. अनेकांनी ही कृती केवळ भेट नव्हे, तर एका कलाकाराकडून दुसऱ्या कलाकाराला दिलेलं खरी दाद असल्याचं म्हटलं.
Kedar Shinde हे मराठी चित्रपटसृष्टीत त्यांच्या वेगळ्या दिग्दर्शनशैलीसाठी ओळखले जातात. ‘अग्गबाई अरेच्चा’, ‘जत्रा’, ‘बाईपण भारी देवा’ आणि अलीकडचा ‘झापुक झुपूक’ अशा चित्रपटांद्वारे त्यांनी प्रेक्षकांच्या मनावर ठसा उमटवला आहे. त्यांच्या चित्रपटांत विनोद, भावनिकता आणि वास्तव यांचा सुरेख संगम दिसतो. आणि आता या छोट्याशा पण मनाला भिडणाऱ्या कृतीने त्यांनी पडद्याबाहेरही माणुसकीची खरी ओळख दाखवली आहे.
इंगोले आजोबांची गायकी आणि हार्मोनियमचा नवा आवाज नक्कीच पुढेही अनेकांच्या कानांवर पडेल. सोशल मीडियाने जोडलेला हा साखळीचा दुवा केवळ व्हिडीओपुरता मर्यादित राहिला नाही, तर एका कलाकाराला नवी ऊर्जा देणारा ठरला. Kedar Shinde सारख्या संवेदनशील कलाकारांमुळेच मराठी कलाक्षेत्रात ‘माणुसकीची’ ही भावना जिवंत राहते, हेच या घटनेतून पुन्हा अधोरेखित झालं.
हे पण वाचा.. अफेअरच्या चर्चांना पूर्णविराम; Mohammad Siraj ला जनाई भोसलेने रक्षाबंधनला बांधली राखी, व्हिडीओ व्हायरल
