kamali annapurna aji new twist : मराठी प्रेक्षकांच्या मनात आपली खास जागा निर्माण करणारी Kamali मालिका सध्या अत्यंत रंजक वळणावर आली आहे. काही दिवसांपूर्वी राजनच्या विनंतीवरून कमळीने महाजनांच्या घरात अन्नपूर्णा आजीची मोठी नात म्हणून प्रवेश केला. आजीला आपल्या मोठ्या नातीवर प्रचंड प्रेम असल्याने तिच्या परतीसाठी ती सतत देवाकडे प्रार्थना करत होती. मात्र सत्य असं आहे की कमळीच तिची खरी नात आहे, पण ही बाब अजूनही अन्नपूर्णा आजींना माहीत नाही.
दरम्यान, कामिनीने रचलेल्या कटकारस्थानामुळे परिस्थिती आणखी बिकट झाली. तिने अन्नपूर्णा आजींना त्यांच्या मोठ्या नातीचा अपघातात मृत्यू झाल्याचं खोटं सांगितलं. या धक्क्याने आजी पूर्णपणे खचून गेली. त्या कोणाशीही बोलत नव्हत्या, स्वतःमध्येच गुरफटून गेल्या होत्या. कमळीला हे सत्य कळताच तिने राजनला सर्व सांगितलं, पण तोपर्यंत उशीर झाला होता. आईला परत सावरण्यासाठी राजनने कमळीला घरात मोठ्या नातीच्या रूपात येण्याची विनंती केली.
कमळीनेही आजीला पुन्हा हसतं-खेळतं पाहण्यासाठी सर्वस्व पणाला लावलं. ती तिची मनापासून सेवा करत राहिली. मात्र आजीची प्रकृती काही सुधारत नव्हती. आता कमळीने एक वेगळाच डाव आखल्याचं नव्या प्रोमोमधून स्पष्ट झालं आहे. रात्रीच्या अंधारात कमळी आणि निंगी काहीतरी योजना राबवत असताना कामिनी त्यांना रंगेहात पकडते. त्यानंतर घरात मोठा गोंधळ उडतो.
राजनही कमळीवर नाराजी व्यक्त करतो. कामिनी तर संतापाच्या भरात कमळीवर हात उगारते आणि तिचा गळा पकडते. तरीही कमळी विरोध करत नाही; ती शांतपणे सगळं सहन करते. हा सगळा प्रसंग दूरवरून अन्नपूर्णा आजी पाहत असतात. कमळीचा होणारा अपमान आणि तिचा आक्रोश आजींना असह्य होतो.
याच क्षणी मालिकेत मोठा ट्विस्ट पाहायला मिळतो. आतापर्यंत मानसिक धक्क्यात असलेल्या अन्नपूर्णा आजी अचानक स्वतः उठून पुढे येतात आणि कामिनीला सणसणीत कानाखाली लगावतात. हा प्रसंग पाहून घरातील सगळेच स्तब्ध होतात. Kamali मालिकेच्या कथानकात हा क्षण निर्णायक ठरणार असल्याचं स्पष्ट होत आहे.
हे पण वाचा.. तारिणी-केदारचं खोटं लग्न उघड होणार? तारिणी मालिकेत नव्या पुराव्याने वाढला सस्पेन्स
२३ आणि २४ फेब्रुवारी रोजी रात्री ९ वाजता प्रसारित होणाऱ्या या विशेष भागाची प्रेक्षक आतुरतेने वाट पाहत आहेत. कमळीचा प्रयत्न अखेर यशस्वी ठरणार का आणि अन्नपूर्णा आजी पूर्णपणे बऱ्या होणार का, याची उत्सुकता शिगेला पोहोचली आहे. Kamali मालिकेतील हा नवा अध्याय निश्चितच प्रेक्षकांना भावूक आणि थरारक अनुभव देणार आहे.
हे पण वाचा.. वांग्याचं भरीत ते प्रोटीन शेक… इंद्रनील कामतचं फिट डाएट रूटीन!
