ashok saraf angatichya kahani : मराठी चित्रपटसृष्टीत आणि प्रेक्षकांच्या मनात अढळ स्थान निर्माण करणारे Ashok Saraf म्हणजे मराठी मनोरंजनविश्वातील एक अविभाज्य नाव. गेल्या पाच दशकांत त्यांनी प्रेक्षकांचे असंख्य मनोरंजन केले आहे. विनोदी भूमिका, गंभीर अभिनय आणि रंगभूमीवरील अफलातून उपस्थिती यामुळे त्यांची कारकीर्द अद्वितीय ठरली आहे. पण त्यांच्या अभिनयाइतकीच चाहत्यांमध्ये चर्चेत असते ती त्यांच्या बोटातील खास अंगठी. ही अंगठी त्यांनी आजवर एकदाही बोटातून काढलेली नाही.
ही कथा सुरू होते १९७४ सालापासून. त्याकाळी अशोक सराफ यांचे मित्र आणि मेकअप आर्टिस्ट विजय लवेकर यांचे दागिन्यांचे छोटेसे दुकान होते. एकदा त्यांनी काही खास अंगठ्या स्टुडिओत आणल्या. त्यातलीच एक अंगठी अशोक मामांनी निवडली. नटराजाची प्रतिमा कोरलेली ही अंगठी त्यांनी आपल्या बोटात घातली आणि ती लगेच फिट बसली. अंगठी पाहताच त्यांनी हसत-हसत मित्राला सांगितलं, “ही आता माझीच!” त्या दिवसापासून ही अंगठी त्यांच्या बोटात कायमची राहिली.
या अंगठीशी जोडलेला किस्सा खूप खास आहे. कारण ती घातल्यानंतर अवघ्या तीन दिवसांत त्यांच्या आयुष्यात मोठं वळण आलं. त्यांना ‘पांडू हवालदार’ या चित्रपटाची ऑफर मिळाली. या चित्रपटाने त्यांची कारकीर्द अक्षरशः बदलून टाकली. प्रेक्षकांनी त्यांना उचलून धरलं आणि त्यानंतर त्यांच्या यशाचा आलेख सतत उंचावत गेला. या घटनेनंतर अशोक मामांच्या मनात अंगठीविषयी प्रचंड श्रद्धा निर्माण झाली.
ते स्वतः म्हणतात, “ही श्रद्धा आहे की अंधश्रद्धा माहीत नाही. पण मी ठरवलंय, ही अंगठी कधीही काढायची नाही.” आज तब्बल ५० वर्षे उलटून गेली, तरीही तीच नटराजाची अंगठी त्यांच्या बोटात आहे. अनेक पुरस्कार, नाटकं, टीव्ही मालिका आणि हिंदी-मराठी सिनेमांच्या माध्यमातून त्यांनी अमाप लोकप्रियता मिळवली. पण त्यांच्या प्रवासातली ही अंगठी केवळ ‘लकी चार्म’ राहिलेली नाही, तर ती त्यांच्या आठवणींशी, यशाशी आणि चाहत्यांच्या प्रेमाशी घट्ट जोडलेली आहे.
हे पण वाचा.. उर्मिला कोठारेनं येरवडा कारागृहातील महिला कैद्यांसोबत साजरा केला नवरात्र उत्सव, शेअर केले खास फोटो
Ashok Saraf यांच्या जीवनप्रवासातल्या या अंगठीची कहाणी ऐकताना असं जाणवतं की कधी कधी छोट्या गोष्टीही आयुष्यात अमूल्य ठरतात. आजही त्यांचे चाहते हीच गोष्ट कौतुकाने सांगतात—”अशोक मामांची अंगठी म्हणजे त्यांच्या यशाचं गुपित!”
हां पण वाचा.. “नवरात्रीत अभिज्ञा भावेचा संकल्प : आईपण, करुणा आणि निस्वार्थी सेवेतून घडलेली खरी जीवनमूल्यं”
