सध्या प्रेक्षकांच्या मनावर अधिराज्य गाजवणारी नवी मालिका म्हणजे ‘Tarini’. ही मालिका नुकतीच ११ ऑगस्ट रोजी प्रेक्षकांच्या भेटीस आली आणि अल्पावधीतच प्रेक्षकांचे लक्ष वेधून घेतले. शिवानी सोनार, अभिज्ञा भावे, स्वराज नागरजोगे आणि प्रशांत केनी हे कलाकार मालिकेत महत्त्वाच्या भूमिका साकारत आहेत. या मालिकेत अनेक नवे चेहरे, तर काही अनुभवी कलाकार एकत्र आल्यामुळे सेटवरचा माहोल रंगतदार असतो.
मात्र, अलीकडेच मालिकेच्या प्रमोशनदरम्यान प्रशांत केनीने आपल्या ऑनस्क्रीन बहिणीची भूमिका साकारणाऱ्या अभिज्ञा भावेबद्दलचा अनुभव उघड केला. ‘अल्ट्रा मराठी’ला दिलेल्या मुलाखतीत प्रशांतने हसत-हसत सांगितलं की, अभिज्ञासोबत काम करताना त्याला वेगळा अभिनय करण्याची गरज भासत नाही. “मालिकेत मला तिच्यापासून घाबरण्याचा अभिनय करावा लागतो, पण प्रत्यक्षातही तिचं व्यक्तिमत्त्व तसं आहे. त्यामुळे मी जेव्हा सीनमध्ये तिला सॉरी म्हणतो, ते खरंच मनापासून असतं,” असं तो म्हणाला.
प्रशांतने पुढे सांगितलं, “याआधी मी अभिज्ञाला अनेक मालिकांमध्ये पाहिलं होतं, पण कधीच एकत्र काम करण्याची संधी मिळाली नव्हती. त्यामुळे तिच्याबद्दल मनात एक आदरयुक्त भीती होतीच. सेटवर ती समोर आली की, अभिनयात जास्त काही करावं लागत नाही. ती जेव्हा आपल्या भूमिकेत असते, तेव्हा तिचा एक कटाक्ष पुरेसा असतो.”
अभिज्ञासोबतच्या कामातील एक खास किस्सा सांगताना प्रशांत म्हणाला, “एकदा आम्ही हॉटेलमधला सीन शूट करत होतो. त्या सीनमध्ये तिने मला असा एक लूक दिला की, मला खरंच वाटलं मी काहीतरी चुकीचं बोललो किंवा केलं आहे. त्या क्षणी मला वाटलं की, हा अभिनय नाही, तर खरी परिस्थिती आहे.”
हे पण वाचा.. Isha Keskar चा जुई गडकरीबद्दल म्हणाली..ती खूप संयमी, तिचा हा गुण मी शिकायला हवा”
Tarini मालिकेत प्रशांत युवराज खांडेकरची, तर अभिज्ञा कौशिकी खांडेकरची भूमिका साकारत आहे. दोघांचे ऑनस्क्रीन नाते हे भाऊ-बहीण असले तरी, त्यातील संवादांमध्ये सूक्ष्म भावनिक ताण आणि आपुलकी दोन्ही जाणवतात. प्रेक्षकांना त्यांच्या केमिस्ट्रीचा प्रत्यय प्रत्येक एपिसोडमध्ये येतो.
अभिज्ञा भावे ही मराठी मालिकांमधील एक बहुप्रतिभावान अभिनेत्री म्हणून ओळखली जाते. गंभीर, ताकदीच्या आणि थोड्या धाकदायक भूमिकांमुळे तिने प्रेक्षकांच्या मनात वेगळी छाप पाडली आहे. त्यामुळेच कदाचित, प्रशांतसारख्या सहकलाकारालाही तिच्यासोबतच्या सीनमध्ये ‘अभिनय करून’ भीती दाखवण्याची गरज भासत नाही.
प्रशांतच्या या खुलाशानंतर ‘Tarini’ मालिकेच्या चाहत्यांमध्ये उत्सुकता वाढली आहे. सेटवरचे हे किस्से ऐकून प्रेक्षक आता मालिकेतील भावंडांच्या नात्याला अधिक बारकाईने पाहत आहेत. मालिकेत पुढे काय घडणार, आणि कौशिकी-युवराजच्या नात्यात कोणते नवे वळण येणार, याची उत्सुकता ताणत आहे.
हे पण वाचा.. तेजश्री प्रधान सोबत पहिल्याच सीनमध्ये आलेलं दडपण; राज मोरेचा ‘वीण दोघांतली ही तुटेना’ मधील अनुभव खास
मराठी मालिकांच्या दुनियेत अशा प्रकारचे सेटवरील किस्से नेहमीच चाहत्यांसाठी खास ठरतात. अभिज्ञा भावे आणि प्रशांत केनी या जोडीने साकारलेल्या ‘Tarini’तील नात्याची गोडी आणि वास्तविक जीवनातील मैत्रीची झलक, मालिकेला आणखी रंगत आणते, हे नक्की.
