भारतातील सर्वाधिक चर्चेत असलेल्या रिअॅलिटी शोमधील ‘Bigg Boss’चा नवीन सीझन लवकरच प्रेक्षकांच्या भेटीला येणार आहे. यंदा ‘Bigg Boss 19’ वेळेपूर्वी म्हणजेच २४ ऑगस्ट २०२५ पासून प्रसारित होणार आहे. शोच्या आगमनापूर्वीच स्पर्धकांच्या संभाव्य यादीवर चाहत्यांमध्ये जोरदार चर्चा सुरू आहे. त्यातच एक नवं नाव समोर आलं आहे – हिमांशी नरवाल.
हिमांशी नरवाल ही काही साधी स्पर्धक नसून, एप्रिल महिन्यात काश्मीरच्या पहलगाममध्ये झालेल्या दहशतवादी हल्ल्यात शहीद झालेल्या नौदल अधिकारी विनय नरवाल यांची पत्नी आहे. त्यांच्या लग्नानंतर काहीच दिवसांनी हा हल्ला झाला आणि या घटनेने संपूर्ण देश हादरला. हनिमूनसाठी काश्मीरला गेलेल्या या दाम्पत्यावर ही दुर्दैवी वेळ आली. त्या वेळी हिमांशीचा पतीच्या पार्थिवाजवळ बसून अश्रू ढाळतानाचा फोटो सोशल मीडियावर व्हायरल झाला होता.
माध्यमांमधून समोर आलेल्या वृत्तानुसार, ‘Bigg Boss 19’च्या निर्मात्यांनी हिमांशी नरवालशी संपर्क साधला असून तिला शोमध्ये सहभागी होण्यासाठी ऑफर दिली आहे. टेलिव्हिजन पोर्टल ‘टेलीचक्कर’च्या अहवालानुसार, निर्माते अशा चेहऱ्यांचा शोध घेत आहेत, जे प्रेक्षकांशी लगेच भावनिक नातं जोडू शकतील. हिमांशीचा जीवनप्रवास आणि तिची कहाणी यामुळे ती या निकषात बसते, म्हणूनच तिच्या नावावर चर्चा रंगली आहे. मात्र, अद्याप अधिकृत पुष्टी झालेली नाही.
‘Bigg Boss 19’चा नवा सीझन आणि बदललेले नियम
यंदाच्या सीझनमध्ये शोला ‘पॉलिटिकल ट्विस्ट’ देण्यात आल्याचे संकेत ट्रेलरमधून मिळाले आहेत. होस्ट सलमान खानने सूचित केले आहे की, या वेळी घरातील निर्णय घेण्याचा संपूर्ण अधिकार स्पर्धकांकडे असेल. तसेच या सीझनमध्ये फक्त १५ सिंगल बेड असतील आणि डबल बेडची सोय काढून टाकण्यात आली आहे. यामुळे, स्पर्धकांची संख्या जास्त आणि बेड कमी असल्याने, पहिल्या दिवसापासूनच घरात संघर्ष आणि स्ट्रॅटेजीचे खेळ पाहायला मिळतील.
यावर्षी शोच्या संभाव्य स्पर्धकांच्या यादीत टीव्ही आणि फिल्म इंडस्ट्रीतील अनेक ओळखीची नावे आहेत. शैलेश लोढा, गुरचरण सिंग आणि मुनमुन दत्ता यांच्यासह अनेकांचे नाव चर्चेत आहे. त्याचबरोबर, जुने विजेते आणि लोकप्रिय चेहरे जसे की एल्विश यादव आणि हिना खान परत येण्याची शक्यता देखील वर्तवली जात आहे.
हे पण वाचा.. अफेअरच्या चर्चांना पूर्णविराम; Mohammad Siraj ला जनाई भोसलेने रक्षाबंधनला बांधली राखी, व्हिडीओ व्हायरल
हिमांशी नरवालचं नाव का आहे चर्चेत?
हिमांशी नरवालचं आयुष्य नुकत्याच घडलेल्या घटनांमुळे पूर्णपणे बदललं. पतीच्या वीरमरणानंतर तिने खूप कठीण प्रसंगांचा सामना केला. तिची कहाणी ही भावनिक, प्रेरणादायी आणि संघर्षमय आहे. निर्मात्यांच्या दृष्टीने, अशा पार्श्वभूमीची व्यक्ती शोमध्ये आल्यास प्रेक्षकांशी एक वेगळा कनेक्ट तयार होऊ शकतो.
जरी शोमध्ये तिच्या सहभागाबद्दल अधिकृत घोषणा झालेली नसली तरी, सोशल मीडियावर तिच्या नावाच्या चर्चांनी वेग घेतला आहे. काही चाहते तिच्या निर्णयाचं समर्थन करत आहेत, तर काहींना वाटतं की, अशा भावनिक जखमेच्या काळात रिअॅलिटी शोमध्ये जाणं योग्य ठरेल का, हा निर्णय तिने स्वतःच्या हितासाठी घ्यावा.
शोची उलटगणती सुरू
‘Bigg Boss 19’च्या आगमनासाठी उलटगणती सुरू झाली असून, प्रोमो आणि ट्रेलर्सनी प्रेक्षकांची उत्सुकता वाढवली आहे. शोमधील टास्क, राजकारण, वादविवाद आणि मनोरंजन यांचा अनोखा संगम यावेळी अधिक तीव्र स्वरूपात पाहायला मिळेल, अशी निर्मात्यांची अपेक्षा आहे.
हिमांशी नरवाल खरोखरच या घरात पाऊल ठेवते का, हे २४ ऑगस्ट रोजी स्पष्ट होईल. मात्र, तिचं नाव समोर आल्यानंतरच ‘Bigg Boss 19’च्या चर्चांना आणखी रंग आला आहे, हे मात्र नक्की.
हे पण वाचा.. Vishal Nikam ची ‘मिस फायर’ला खास शुभेच्छा; ‘येड लागलं प्रेमाचं’ फेम पूजा बिरारीच्या वाढदिवशी भावनिक पोस्ट
