मुंबईतील वाहतुकीची अवस्था अनेक वर्षांपासूनच नागरिकांना डोकेदुखी ठरत आहे. विशेषतः पावसाळा सुरू झाला की रस्त्यांवरील खड्डे, वाहतूककोंडी, आणि अपघातांचे प्रमाण झपाट्याने वाढते. त्यातही ठाणे-घोडबंदर रोडचा उल्लेख केला तर नागरिकांचा संयम सुटतो. या मार्गावर प्रवास करणाऱ्या नागरिकांना दररोज खड्ड्यांचा सामना करावा लागतो, आणि सरकारकडून होणाऱ्या निष्क्रियतेने त्यांचा संताप आणखी वाढतो.
या पार्श्वभूमीवर आता मराठी मनोरंजनसृष्टीतील लोकप्रिय अभिनेता Aastad Kale याने या समस्येला आवाज दिला आहे. आपल्या अधिकृत सोशल मीडिया अकाउंटवरून त्याने एक व्हिडीओ शेअर केला आहे, ज्यात त्याने ठाणे-घोडबंदर रस्त्यावरील खड्ड्यांची स्थिती स्पष्टपणे दाखवली आहे. फक्त इतकंच नाही, तर या रस्त्यांच्या दुरवस्थेसाठी थेट केंद्रीय मंत्री नितीन गडकरी, मुख्यमंत्री देवेंद्र फडणवीस यांना जबाबदार धरून त्यांना प्रश्न विचारले आहेत.
व्हिडीओमध्ये Aastad Kale म्हणतो, “हा आहे Golden Quadrilateral रोडचा भाग… पण या रस्त्याची ही अवस्था म्हणजे चक्क अपमान आहे त्या नावाचा. अजून किती वर्षे आम्ही नागरिक जीव मुठीत घेऊन प्रवास करायचा? तुमचं सरकार, तुमचे नगरसेवक, तुमचं प्रशासन – कुणालाच या मार्गाची पर्वा नाही.
हे पण वाचा.. मराठी सिनेमा Dashavatar’चा गूढतेने भरलेला भव्य टीझर प्रदर्शित; कलाकारांची अफाट मांदियाळी!
पुढे तो सरकारच्या ढिसाळ नियोजनावर टीका करत म्हणतो, “Golden Quadrilateral लिहायला लाज नाही वाटत का? मी टॅक्स भरतो. मी एक सामान्य नागरिक आहे. पण रोज गाडीच्या चाकाखाली माझ्या पैशांचा अपमान होतोय. हे थांबायला हवं.”
Aastad Kale ने सांगितल्याप्रमाणे, काही दिवसांपूर्वी हा रस्ता कामासाठी बंद ठेवण्याची घोषणा झाली होती. यंत्रसामग्री आणून ठेवल्याचं दिसून आलं होतं. नागरिकांनी वाहतूककोंडी सहन करत समजूत घेतली होती की निदान काहीतरी सुधारणा होईल. मात्र, प्रत्यक्षात काहीच काम झालं नाही. त्यावर तो म्हणतो, “पाऊस आता थांबलेला आहे. हवामान कामासाठी योग्य आहे. पण तुमची इच्छाच नाही. कारण तुम्ही स्वतः कधी या खड्ड्यांमधून प्रवास करत नाही – हेलिकॉप्टरने जाता तुम्ही!”
या व्हिडीओतून Aastad Kale चा संताप केवळ रस्त्यांच्या अवस्थेबाबत नव्हे, तर प्रशासनाच्या असंवेदनशीलतेबाबत स्पष्ट दिसून येतो. तो पुढे म्हणतो, “हे बघा – हे खड्डे फक्त खड्डे नाहीत, हे रोजचा धोका आहे. आम्हाला यामधून आमची गाडी, आमचं आरोग्य, आमचं आयुष्य झुंजवत जपावं लागतं.”
सध्या सोशल मीडियावर हा व्हिडीओ मोठ्या प्रमाणावर व्हायरल झाला आहे. अनेक युजर्सनी Aastad Kale च्या भूमिकेला पाठिंबा दिला असून त्याच्या निर्भीड प्रश्नांवर एकमुखाने सहमती दर्शवली आहे. कमेंट्समध्ये “बरोबर बोललात”, “आता कुणीतरी बोललं!”, “हे रस्ते म्हणजे ट्रॅक्टरसाठी खास तयार केल्यासारखे वाटतात” अशा प्रतिक्रिया मिळत आहेत.
सार्वजनिक रस्त्यांच्या दुरवस्थेबाबत आजवर अनेक नागरिकांनी आणि काही कलाकारांनी आवाज उठवला आहे, पण Aastad Kale चा हा व्हिडीओ अधिक प्रभावी ठरतो कारण तो एका जबाबदार नागरिकाच्या भूमिकेतून व्यक्त होतो. तो केवळ टीका करत नाही, तर सरळसरळ उत्तरं मागतो — जी आज प्रत्येक शहरवासी मागतो आहे.
या प्रकारच्या आवाजांमुळेच सरकारला वास्तवाच्या जमिनीवर आणण्याची शक्यता असते. मात्र, प्रश्न एवढाच आहे – ‘हेलिकॉप्टरमध्ये बसलेल्यांना खाली खड्डे दिसतात का?’
