devmanus gopal lali samora samor navin valan : झी मराठीवरील लोकप्रिय मालिका Devmanus सध्या अत्यंत रंजक टप्प्यावर येऊन ठेपली आहे. सुरुवातीपासूनच या मालिकेत रहस्य, गुन्हेगारी आणि मानवी स्वभावातील काळी बाजू यांचा संगम पाहायला मिळत आहे. आता मालिकेत एक मोठा ट्विस्ट येणार असल्याचे समोर आलेल्या नव्या प्रोमोमधून स्पष्ट झाले आहे.
कथानकातील देवीसिंग ऊर्फ गोपाळ हा प्रत्यक्षात जसा भासवतो तसा नसून त्याच्या मुखवट्याआड एक निर्दयी खुनी दडलेला आहे. खऱ्या गोपाळचा खून करून त्याची ओळख स्वीकारणाऱ्या देवीसिंगने गावात विश्वासाचं जाळं विणलं. कुटुंबीय आणि गावकऱ्यांची मने जिंकताना त्याने आपली काळी कृत्ये मात्र लपवून ठेवली. पैशाच्या आणि स्वार्थाच्या हव्यासापोटी त्याने अनेकांचे जीव घेतले, पण प्रत्येक वेळी तो पुराव्यांच्या अभावामुळे सुटताना दिसला.
या सगळ्या प्रवासात लाली ही त्याची साथ देताना दिसली. गोपाळवरील तिच्या आंधळ्या प्रेमामुळे ती स्वतःही गुन्ह्यांच्या गर्तेत ओढली गेली. गोपाळ दुसऱ्या स्त्रीकडे वळतोय अशी शंका आली की, ती थेट टोकाचा निर्णय घेते. माधुरी आणि आर्या या दोघींच्या मृत्यूमागे लालीचा हात असल्याचे दाखवण्यात आले आहे. गोपाळवर संकट येऊ नये, तो पोलिसांच्या तावडीत सापडू नये, यासाठी ती काहीही करण्यास तयार असल्याचे चित्र रंगवले गेले.
आता मात्र समीकरणे बदलताना दिसत आहेत. नव्या प्रोमोमध्ये लालीला खुर्चीला बांधून ठेवलेले दाखवले आहे. त्याचवेळी गोपाळ जोकरच्या वेशात तिच्यासमोर येतो. “माझा जोकर करून ठेवलाय ना? आता बघ मी माझे खेळ कसे खेळतो,” असे म्हणत तो लालीला जबरदस्तीने हसायला सांगतो. त्याच्या या विचित्र वागण्यामुळे वातावरणात भीती आणि थरार दोन्ही निर्माण होतात. विशेष म्हणजे लालीदेखील अनपेक्षितपणे वेगळ्या पद्धतीने प्रतिक्रिया देते आणि गोपाळच्या चेहऱ्यावर क्षणभर संभ्रम उमटतो.
या प्रोमोखाली प्रेक्षकांनी मोठ्या प्रमाणावर प्रतिक्रिया दिल्या आहेत. “आता खरी मजा येणार”, “लालीचा भूतकाळ दाखवा”, “चोरावर मोर” अशा कमेंट्स सोशल मीडियावर झळकत आहेत. मालिकेतील तणावपूर्ण घडामोडी पाहण्यासाठी अनेक जण रात्री ठराविक वेळी टीव्हीसमोर हजर राहत असल्याचेही कमेंट्समधून दिसून येते.
हे पण वाचा.. अमृता देशमुख कडून आईसाठी खास सरप्राइज; १९६६ ची लिमिटेड एडिशन म्हणत साजरा केला ६० वा वाढदिवस
दरम्यान, इन्स्पेक्टर जामकर खुनांच्या मालिकेचा तपास करत असून त्यांना वारंवार गोपाळवर संशय येतो. मात्र ठोस पुरावा हाती लागत नसल्याने कारवाई होऊ शकत नाही. आता लाली-गोपाळ संघर्षातून नवे सत्य बाहेर येणार का? की आणखी एखादा धक्कादायक खेळ रंगणार? Devmanus मध्ये पुढे काय घडते, याकडे सर्वांचे लक्ष लागले आहे.
हे पण वाचा.. अजिंक्य राऊतचा ‘पान की दुकान’ गाण्यावर भन्नाट डान्स; लोकप्रिय अभिनेत्रीनेही केलं कौतुक
