mrunmayee deshpande mahabaleshwar farm life : एखादी लोकप्रिय अभिनेत्री म्हटलं की आलिशान घर, चमकदार लाईफस्टाइल आणि शहरातील धावपळ असं चित्र सहज डोळ्यासमोर येतं. मात्र मराठी कलाविश्वातील काही अभिनेत्री या चौकटीबाहेर जाऊन स्वतःचं वेगळं आयुष्य जगताना दिसतात. त्यातीलच एक ठळक नाव म्हणजे Mrunmayee Deshpande. अभिनय, दिग्दर्शन आणि लेखनात स्वतःची ओळख निर्माण केलेल्या मृण्मयीने काही वर्षांपूर्वी मुंबईला अलविदा करत महाबळेश्वरचा मार्ग निवडला.
गेल्या काही काळापासून मृण्मयी तिच्या पती स्वप्निलसोबत महाबळेश्वरमध्ये स्थायिक आहे. निसर्गाच्या कुशीत, डोंगररांगांनी वेढलेल्या परिसरात त्यांनी सुंदर असं घर उभारलं असून त्याच ठिकाणी ‘नील अँड मोमो फार्म’ ही संकल्पना प्रत्यक्षात आणली आहे. हे केवळ शेत नाही, तर शिकण्याची, अनुभव घेण्याची आणि स्वतःला नव्याने शोधण्याची जागा असल्याचं मृण्मयी वेळोवेळी सांगत आली आहे.
अलीकडेच या शेतात एक खास जागा उभारण्यात आली असून ती शेतीविषयक वर्कशॉप आणि शिक्षणासाठी वापरण्यात येणार आहे. स्वप्निल याठिकाणी शेती, निसर्ग आणि शाश्वत जीवनशैलीशी संबंधित वर्ग घेणार आहे. या जागेला त्यांनी ‘Classroom Without Walls’ असं नाव दिलं असून, निसर्गाच्या सानिध्यात कोणतीही भिंत नसलेली ही शिकण्याची जागा पाहून अनेकजण भारावून गेले आहेत.
मृण्मयीने सोशल मीडियावर शेअर केलेल्या पोस्टमध्ये या प्रवासामागची भावना अत्यंत प्रामाणिकपणे मांडली आहे. शेत विकत घेतल्यापासूनच स्वप्निलने इथे शिकवावं, लोकांनी एकत्र यावं आणि ज्ञानाची देवाणघेवाण व्हावी, ही इच्छा होती, असं तिने सांगितलं. तिच्या मते, ज्ञान एकमेकांसोबत शेअर करण्यासाठी एकत्र येणं हेच खरं समाधान आहे. या जागेत भविष्यात देश-विदेशातील विचारवंत, कलाकार आणि अभ्यासक एकत्र येऊन संवाद साधतील, असा विश्वास तिने व्यक्त केला आहे.
मात्र हा प्रवास सोपा नव्हता, हे सांगायलाही ती विसरलेली नाही. प्रतिकूल हवामान, सततच्या अडचणी आणि संयमाची कसोटी पाहणारे अनुभव या शेताने दिले. तरीही प्रत्येक लहान यश साजरं करत त्यांनी पुढे जाणं निवडलं. झगडून वाढलेलं एखादं झाड असो किंवा पाच वर्षांनी पूर्ण झालेल्या दगडी पायऱ्या – प्रत्येक गोष्टीतून त्यांनी आनंद शोधला.
हे पण वाचा.. Bigg Boss Marathi 6 मध्ये पुन्हा गोंधळ! राखी सावंतचा नियमभंग, प्राजक्तावर पीठ फेकलं अन् खुर्ची पाडल्याने वाद पेटला
मृण्मयीच्या या पोस्टनंतर चाहत्यांनी तिच्या साधेपणाचं आणि सकारात्मक दृष्टिकोनाचं भरभरून कौतुक केलं आहे. अभिनयासोबतच वास्तव आयुष्यातही प्रेरणादायी ठरणारी Mrunmayee Deshpande आज अनेकांसाठी शहराबाहेरच्या नव्या जीवनशैलीचं उदाहरण ठरत आहे.
हे पण वाचा.. लग्नानंतर होईलच प्रेम : रम्याच्या कारस्थानामुळे पार्थ-काव्याच्या नात्यात ताण, जीवाने नंदिनीला दिला Gen-Z सल्ला
