मराठी राजकारणात आपली वेगळी ओळख निर्माण केलेले उपमुख्यमंत्री अजित पवार (Ajit Pawar) हे थेट बोलण्याबरोबरच आपल्या मिश्किल टिपण्ण्यांसाठीही ओळखले जातात. जे काही बोलायचं ते थेट मुद्द्यावर आणि त्यातही हलक्याफुलक्या शैलीत लोकांना हसवत प्रतिक्रिया देणे ही त्यांची खासियत आहे. त्यामुळेच त्यांच्या भाषणाची नेहमीच चर्चा रंगते.
पुण्यात नुकताच अखिल भारतीय नाट्य परिषदेचा वर्धापनदिन सोहळा पार पडला. या सोहळ्याला अजित पवार उपस्थित होते. यावेळी अभिनेत्री स्पृहा जोशी, दिग्दर्शक प्रवीण तरडे आणि अभिनेता संकर्षण कऱ्हाडे यांचा सन्मान करण्यात आला. कार्यक्रमात संकर्षण कऱ्हाडेच्या राजकारणावर आधारित एका कवितेचा संदर्भ निघताच अजित पवारांनी त्यांच्या खुमासदार अंदाजात प्रतिक्रिया देत संकर्षणची ‘शाळा’ घेतली.
संकर्षण कऱ्हाडेने आपल्या कवितेत राजकीय अंगाने केलेल्या टिपण्णींचा उल्लेख करताना Ajit Pawar म्हणाले,
“संकर्षणने मराठवाडा आणि सासुरवाडीचा उल्लेख केला. जगात जर्मनी आणि भारतात परभणी असं त्याचं टिपिकल वाक्य आहे. खरं सांगायचं तर परभणीत काही असो वा नसो, पण हे वाक्य त्याला उत्तम जमलंय. मीही परभणीत काम केलेलं असल्याने याची मला चांगली आठवण आहे.”
यावेळी पुढे ते थोड्या मिश्किल शैलीत म्हणाले, “त्याने जे सांगितलं त्यातलं अर्धं खरं आहे आणि अर्धं खोटं. मी हे त्याच्या तोंडावर सांगतो कारण मी नेहमी खरं बोलतो. निवडणुकीच्या काळात त्याने आमच्यावर कविता केली होती ज्यात ‘पवार तोंडात सोन्याचा चमचा घेऊन जन्माला आले’ असं म्हटलं होतं.”
इतक्यात संकर्षणने उत्तर दिलं, “सर, हे मी बोललोच नव्हतो.”
त्यावर Ajit Pawar ही हसत उत्तरले, “अरे, तू मगाशी मी न सांगितलेलं बोललास ना? माझी एक शैली आहे. मी कुणाच्या वाट्याला जात नाही. पण कुणी माझ्या वाट्याला आलं तर मी त्याला कधीच सोडत नाही. आणि हे संपूर्ण महाराष्ट्राला ठाऊक आहे. आता ही कविता मी तुझ्याच नावावर खपवणार.”
या वाक्यानंतर संपूर्ण सभागृहात हास्याचा जोरदार फवारा उडाला आणि टाळ्यांचा कडकडाट झाला.
कार्यक्रमात बोलताना Ajit Pawar यांनी आपल्या आयुष्याची काही आठवणही सांगितली. ते म्हणाले,
“मी स्वतः गाईचं शेण काढलंय, धारा काढल्या आहेत. मी शेतात राबलो आहे. आता गणेशोत्सवात जेव्हा मी बारामतीला जाणार आहे, तेव्हाही वेळ काढून मी माझ्या शेतात जाणार आहे. राजकारणात मी अचानक आलो. लोक म्हणायचे की, तू इतका स्पष्ट बोलणारा आहेस, राजकारणात टिकणार नाहीस. तुझं नाणं चालणार नाही. पण काय झालं? जनतेला हेच आवडलं आणि माझं नाणं पुढे सरकत राहिलं.”
हे पण वाचा.. Bigg Boss 19 : मराठी कॉमेडियन प्रणित मोरेची घरात एन्ट्री, चाहत्यांमध्ये उत्सुकता शिगेला
जरी Ajit Pawar यांनी संकर्षणवर मिश्किल शैलीत टोले लगावले, तरी त्याचं कौतुक करायलाही विसरले नाहीत. ते म्हणाले,
“मराठवाड्यासारख्या मागासलेल्या भागातून पुढे येऊन स्वतःचा ठसा उमटवणं हे सोपं काम नाही. संकर्षणने ते करून दाखवलं आहे. त्यामुळे तुझं मनापासून अभिनंदन आणि पुढील वाटचालीसाठी शुभेच्छा.”
यावेळी संकर्षण कऱ्हाडेला आचार्य अत्रे पुरस्कार देऊन गौरविण्यात आलं.
एकंदर पाहता, Ajit Pawar यांनी त्यांच्या मिश्किल पण थेट शैलीत संकर्षण कऱ्हाडेच्या कवितेवर दिलेल्या प्रत्युत्तराने कार्यक्रम रंगतदार झाला. प्रेक्षकांमध्ये हास्य आणि टाळ्यांचा वर्षाव झाला. त्याचबरोबर, संकर्षणच्या कार्याचं कौतुक करून अजित पवारांनी पुन्हा एकदा आपली राजकीय परिपक्वता आणि विनोदबुद्धी यांची जुळवाजुळव दाखवून दिली.
